AQSH Ukrainaga 1,25 mlrd dollarlik yordam paketini tayyorlamoqda

Qo‘shma Shtatlar Rossiya hujumlarini qaytarish uchun Ukrainaga taxminan 1,25 milliard dollarlik yangi harbiy yordam paketini tayyorlamoqda. Bu haqda kecha, 27 dekabr kuni AP agentligiga anonimlik sharti bilan ikki amerikalik amaldor ma’lum qildi.

Ularga ko‘ra, bu haqda 30 dekabr kuni rasman e’lon qilinadi. Boshqa narsalar qatorida, paketga 155 va 105 millimetrli ko‘p sonli artilleriya snaryadlari, Stinger havo mudofaa tizimi uchun raketalari, HAWK va NASAMS havo mudofaa tizimlari uchun o‘q-dorilar kiradi.

Agentlik ta’kidlaganidek, Prezident Jo Bayden ma’muriyati 20 yanvarga belgilangan prezidentlikka saylangan Donald Trampning qasamyod qilishiga qadar Pentagon zaxirasidan Ukrainaga berilgan 5,6 milliard dollarlik harbiy yordamning qolgan barcha mablag‘laridan foydalanishga ulgurmasligi mumkin. Joriy hafta Bayden Mudofaa vazirligiga Kiyevga qurol yetkazib berishni ko‘paytirishni davom ettirish bo‘yicha ko‘rsatma berdi.

Bundan tashqari, Pentagon ma’lumotlariga ko‘ra, Vashingtonda Ukraina xavfsizligiga ko‘maklashish tashabbusi orqali uzoq muddatli moliyalashtirish uchun taxminan 1,2 milliard dollar qolgan. Bu mablag‘lar bir yil va undan ko‘proq vaqt davomida yetkazib beriladigan qurol-yarog‘lar bo‘yicha shartnomalarni to‘lashga sarflanadi. Rasmiylarning ta’kidlashicha, ma’muriyat bu pullarning barchasini kalendar yili oxirigacha berishi kutilmoqda.

Eslatib o‘tamiz, avvalroq Ukraina Prezidenti Vladimir Zelenskiy Yaponiya Bosh vaziri Sigeru Isiba bilan telefon suhbatidan so‘ng Yaponiya hukumati Rossiyaning muzlatilgan aktivlaridan tushgan foydadan Kiyevga yana 3 milliard dollar o‘tkazishini ma’lum qilgandi. Zelenskiy Isiba bilan suhbatda Yaponiya hukumati va xalqiga “minglab odamlarning hayotini saqlab qolish imkonini beruvchi umumiy qiymati 12 milliard dollarlik barcha yirik gumanitar va moliyaviy yordam uchun” minnatdorlik bildirdi. Shuningdek, u Yaponiya Bosh vaziriga 25 dekabrga o‘tar kechasi Rossiya qo‘shinlari tomonidan Ukraina energetika infratuzilmasini ommaviy ravishda o‘qqa tutgani haqida gapirib berdi.