АҚШ Украинага 1,25 млрд долларлик ёрдам пакетини тайёрламоқда

Қўшма Штатлар Россия ҳужумларини қайтариш учун Украинага тахминан 1,25 миллиард долларлик янги ҳарбий ёрдам пакетини тайёрламоқда. Бу ҳақда кеча, 27 декабрь куни AP агентлигига анонимлик шарти билан икки америкалик амалдор маълум қилди.

Уларга кўра, бу ҳақда 30 декабрь куни расман эълон қилинади. Бошқа нарсалар қаторида, пакетга 155 ва 105 миллиметрли кўп сонли артиллерия снарядлари, Stinger ҳаво мудофаа тизими учун ракеталари, HAWK ва NASAMS ҳаво мудофаа тизимлари учун ўқ-дорилар киради.

Агентлик таъкидлаганидек, Президент Жо Байден маъмурияти 20 январга белгиланган президентликка сайланган Дональд Трампнинг қасамёд қилишига қадар Пентагон захирасидан Украинага берилган 5,6 миллиард долларлик ҳарбий ёрдамнинг қолган барча маблағларидан фойдаланишга улгурмаслиги мумкин. Жорий ҳафта Байден Мудофаа вазирлигига Киевга қурол етказиб беришни кўпайтиришни давом эттириш бўйича кўрсатма берди.

Бундан ташқари, Пентагон маълумотларига кўра, Вашингтонда Украина хавфсизлигига кўмаклашиш ташаббуси орқали узоқ муддатли молиялаштириш учун тахминан 1,2 миллиард доллар қолган. Бу маблағлар бир йил ва ундан кўпроқ вақт давомида етказиб бериладиган қурол-яроғлар бўйича шартномаларни тўлашга сарфланади. Расмийларнинг таъкидлашича, маъмурият бу пулларнинг барчасини календар йили охиригача бериши кутилмоқда.

Эслатиб ўтамиз, аввалроқ Украина Президенти Владимир Зеленский Япония Бош вазири Сигэру Исиба билан телефон суҳбатидан сўнг Япония ҳукумати Россиянинг музлатилган активларидан тушган фойдадан Киевга яна 3 миллиард доллар ўтказишини маълум қилганди. Зеленский Исиба билан суҳбатда Япония ҳукумати ва халқига “минглаб одамларнинг ҳаётини сақлаб қолиш имконини берувчи умумий қиймати 12 миллиард долларлик барча йирик гуманитар ва молиявий ёрдам учун” миннатдорлик билдирди. Шунингдек, у Япония Бош вазирига 25 декабрга ўтар кечаси Россия қўшинлари томонидан Украина энергетика инфратузилмасини оммавий равишда ўққа тутгани ҳақида гапириб берди.