AQSH tarkibini erta e’lon qildi. Bu O‘zbekistonga hurmatsizlikmi?

Avval xabar berilganidek, bugun, 9 sentyabr kuni, 10 sentyabrga o‘tar kechasi FIFA kunlari doirasida O‘zbekiston milliy terma jamoasi Amerika Qo‘shma Shtatlariga qarshi o‘rtoqlik o‘yinida maydonga tushadi. Uchrashuvdan avval jamoa murabbiylari ishtirokida tashkil etilgan matbuot anjumanida AQSH termasi bosh murabbiyi Gregg Berxalter O‘zbekistonga qarshi maydonga tushadigan asosiy tarkib futbolchilar ro‘yxatini e’lon qildi.

Bu holat ko‘pchilikning bevosita e’tirozlariga sabab bo‘ldi, hatto mahalliy jurnalistlardan biri mutaxassisga “bu O‘zbekistonga nisbatan hurmatsizlik emasmi?” degan savol bilan murojaat qildi. AQSH murabbiyi bu savolga “o‘rtoqlik o‘yinlari uchun asosiy tarkibni ertaroq e’lon qilinishi xavotirli emas va bu tarkib o‘zimga yoqadi”, deb javob qaytardi.  

Voqealar rivojida O‘FA matbuot xizmati rahbari Davron Fayziyev mazkur holat yuzasidan o‘z munosabatini bildirdi.

“Bugun tungi 02:30 da O‘zbekiston va AQSH terma jamoalari o‘rtasidagi tarixdagi birinchi uchrashuv bo‘lib o‘tadi. Raqiblar murabbiyi 1 kun avval tarkibni e’lon qilib yubordi. Favoritligini qayd etib qo‘ymoqchi. Bizning futbolchilar munosib javob berishiga umid qilamiz”, deydi Davron Fayziyev.

Shuningdek, AQSH matbuoti ham yuqoridagi xabarlar fonida O‘zbekiston milliy terma jamoasining asosiy tarkibdagi taxminiy 11 kishiligini e’lon qildi.

Darvozabon: O‘tkir Yusupov;

Himoyachilar: Sherzod Nasrullayev, Umar Eshmurodov, Abdulla Abdullayev, Hojakbar Alijonov

Yarim himoyachilar: Akmal Mozgovoy, Jamshid Iskandarov, Otabek Shukurov.

Hujumchilar: Eldor Shomurodov, Jaloliddin Masharipov, Oston O‘runov.

Gregg Berxalter rasman e’lon qilgan tarkib esa quyida keltirilgan.

Darvozabon: Metyu Tyorner;

Himoyachilar: Entoni Robinson, Tim Rim, Kristofer Richards, Serjino Dest;

Yarim himoyachilar: Ueston Makkenni, Frensis Tessmann, Yunus Musa;

Hujumchilar: Kristian Pulishich, Folarin Balogan, Timoti Vea.