AQSH senatori Trampga qarshi to‘xtovsiz 25 soat gapirib, rekord o‘rnatdi (video)

Demokrat senator Kori Buker AQSH Senatida tarixiy norozilik namoyishini o‘tkazib, Prezidenti Donald Tramp siyosati olib borayotgan xavflardan ogohlantiruvchi rekord darajadagi nutq so‘zladi. Nyu-Jersi shtatidan saylangan senator 25 soatu 5 daqiqa nutq so‘zladi, bu AQSH Kongressi yuqori palatasining zamonaviy tarixidagi rekorddir. Bu haqda kecha, 1 aprel kuni Bukerning ofisiga tayanib, CNN xabar berdi.

Bu bilan 55 yoshli siyosatchi 1957 yilda fuqarolik huquqlari to‘g‘risidagi qonunga qarshi 24 soat 18 daqiqa gapirgan senator Strom Tyurmond o‘rnatgan rekordni ortda qoldirdi.

Nutq demokratlarning eng baland norozilik namoyishlaridan biriga aylandi. Buker nutqini sharqiy vaqt bilan 31 mart kuni soat 19:00 (Toshkent vaqti bilan 1 aprel soat 4:00)da boshladi va agar u “jismoniy qodir” bo‘lsa, norozilikni davom ettirishga va’da berdi. 

“Atgina 71 kun ichida Amerika Qo‘shma Shtatlari Prezidenti Amerika xavfsizligiga, moliyaviy barqarorligiga, demokratiyamiz asoslariga shunchalik katta zarar yetkazdi... Bu Amerikada oddiy davr emas. Qo‘shma Shtatlar Senatida bunday deb hisoblamaslik kerak”, dedi Buker. 

Telekanal, shuningdek, Bukerning marafondagi nutqi saylovchilar tomonidan Trampga nisbatan keskinroq pozitsiyani egallashni talab qilayotgan demokratlarga bosim kuchayishi fonida bo‘lib o‘tganini ta’kidlaydi.

“Senatorning nutqi demokrat qonunchining Oq uyning amaldagi rahbarining ikkinchi muddati boshlanganidan beri eng baland norozilik namoyishlaridan biri bo‘ldi”, deb hisoblaydi CNN.

Nutq Senatning 1 apreldagi qonun ijodkorligi ishini amalda kechiktirdi, chunki u kechgacha davom etdi.

Senator to‘xtovsiz gapirdi. Buker hech qanday tanaffus qilmadi, chunki bu Vakillar Palatasining raisiga Senat ishini davom ettirish imkonini bergan bo‘lardi. Faqatgina qisqa ibodat va demokratlarning savollariga javoblar bundan mustasno edi.

Biroq o‘sha kuni Senat kun tartibidagi qonunchilik tashabbuslari bo‘yicha ovoz berish bo‘lmadi.

Ma’lumot uchun, Kori Buker 2013 yildan beri senator. U Nyu-Jersi shtatidan Senatda vakillik qilgan birinchi afro-amerikalik va hozirda AQSH Kongressining yuqori palatasida faoliyat yuritayotgan 100 nafar senator orasidagi beshta afro-amerikalikdan biri.