АҚШ сенатори Трампга қарши тўхтовсиз 25 соат гапириб, рекорд ўрнатди (видео)

Демократ сенатор Кори Букер АҚШ Сенатида тарихий норозилик намойишини ўтказиб, Президенти Дональд Трамп сиёсати олиб бораётган хавфлардан огоҳлантирувчи рекорд даражадаги нутқ сўзлади. Нью-Жерси штатидан сайланган сенатор 25 соату 5 дақиқа нутқ сўзлади, бу АҚШ Конгресси юқори палатасининг замонавий тарихидаги рекорддир. Бу ҳақда кеча, 1 апрель куни Букернинг офисига таяниб, CNN хабар берди.

Бу билан 55 ёшли сиёсатчи 1957 йилда фуқаролик ҳуқуқлари тўғрисидаги қонунга қарши 24 соат 18 дақиқа гапирган сенатор Стром Тюрмонд ўрнатган рекордни ортда қолдирди.

Нутқ демократларнинг энг баланд норозилик намойишларидан бирига айланди. Букер нутқини шарқий вақт билан 31 март куни соат 19:00 (Тошкент вақти билан 1 апрель соат 4:00)да бошлади ва агар у “жисмоний қодир” бўлса, норозиликни давом эттиришга ваъда берди. 

“Атгина 71 кун ичида Америка Қўшма Штатлари Президенти Америка хавфсизлигига, молиявий барқарорлигига, демократиямиз асосларига шунчалик катта зарар етказди... Бу Америкада оддий давр эмас. Қўшма Штатлар Сенатида бундай деб ҳисобламаслик керак”, деди Букер. 

Телеканал, шунингдек, Букернинг марафондаги нутқи сайловчилар томонидан Трампга нисбатан кескинроқ позицияни эгаллашни талаб қилаётган демократларга босим кучайиши фонида бўлиб ўтганини таъкидлайди.

“Сенаторнинг нутқи демократ қонунчининг Оқ уйнинг амалдаги раҳбарининг иккинчи муддати бошланганидан бери энг баланд норозилик намойишларидан бири бўлди”, деб ҳисоблайди CNN.

Нутқ Сенатнинг 1 апрелдаги қонун ижодкорлиги ишини амалда кечиктирди, чунки у кечгача давом этди.

Сенатор тўхтовсиз гапирди. Букер ҳеч қандай танаффус қилмади, чунки бу Вакиллар Палатасининг раисига Сенат ишини давом эттириш имконини берган бўларди. Фақатгина қисқа ибодат ва демократларнинг саволларига жавоблар бундан мустасно эди.

Бироқ ўша куни Сенат кун тартибидаги қонунчилик ташаббуслари бўйича овоз бериш бўлмади.

Маълумот учун, Кори Букер 2013 йилдан бери сенатор. У Нью-Жерси штатидан Сенатда вакиллик қилган биринчи афро-америкалик ва ҳозирда АҚШ Конгрессининг юқори палатасида фаолият юритаётган 100 нафар сенатор орасидаги бешта афро-америкаликдан бири.