AQSH Rossiyaga qarshi sanksiyalar kiritishi ortidan neft narxi oshdi

Qo‘shma Shtatlar tomonidan Rossiya neft sektoriga qarshi e’lon qilingan yangi sanksiyalar fonida bugun, 13 yanvar kuni neft narxi so‘nggi oylardagi eng yuqori darajaga yetdi. Bu haqda “Reuters” xabar berdi.

Shunday qilib, Brent markali neft uchun fyuchers narxi bir barrel uchun 81,11 dollargacha ko‘tarildi, bu 2024 yil avgust oyi oxiridan beri eng yuqori ko‘rsatkichdir. Narx bir kun ichida 81,44 dollarni tashkil etdi.

Shu bilan birga, Amerikaning West Texas Intermediate nefti 1,40 dollarga ko‘tarilib, bir barreli uchun 77,97 dollarni tashkil etdi, bu 2024 yil oktyabr oyi boshida ko‘rsatilgan rekord darajadagi 78,32 dollarga yaqinlashdi.

AQSH 10 yanvar kuni Rossiya energetika sektoriga qarshi yangi sanksiyalarni e’lon qildi . Sanksiyalar ro‘yxatiga, xususan, “Gazprom neft” va “Surgutneftegaz”, o‘nlab neft-servis kompaniyalari va Rossiya Federatsiyasidan neft savdosi bilan shug‘ullanuvchi treyderlar kiritilgan.

AQSH Milliy Iqtisodiy Kengashi direktori Dalip Singx ushbu choralarni “eng muhim” deb atadi va bu cheklovlar Rossiyaga oyiga milliardlab dollarga tushishi mumkinligini aytdi.

Vaziyatni sharhlar ekan, Rossiya TIV cheklovlar hatto jahon bozorlarini beqarorlashtirish xavfi evaziga joriy etilayotganini aytdi va Moskva sanksiyalarga javob qaytarishiga va’da berdi.

Eslatib o‘tamiz, avvalroq Buyuk Britaniya ham Rossiyaning “Gazprom neft” va “Surgutneftegaz” kompaniyalariga qarshi sanksiyalar joriy qilgandi. Britaniya rasmiylariga ko‘ra, kompaniyalarni sanksiyalar ro‘yxatiga kiritishning sababi ularning Rossiya hukumati tomonidan foyda olishdagi ishtirokini yoki hukumatga yordam ko‘rsatishini o‘z ichiga oladigan, Rossiya hukumati uchun strategik ahamiyatga ega bo‘lgan sohada, aniqroq aytganda, Rossiyaning energetika sektorida faoliyat yuritishi deya ko‘rsatilgan. Bundan tashqari ikkinchi sabab sifatida ularning hukumatga iqtisodiy ahamiyatga ega faoliyat olib borishiga ko‘maklashgani aytiladi.