AQSH Isroilga 7,4 mlrd dollarlik qurol sotadi

AQSH ma’muriyati Isroilga 7,4 milliard dollarlik yangi qurollar sotishni ma’qulladi. Bu haqda CNN xabar berdi.

Pentagonning Mudofaa xavfsizligi bo‘yicha hamkorlik agentligi Kongressga yuborgan bildirishnomasiga ko‘ra, AQSH Davlat departamenti Isroilga 7,4 milliard dollarlik qurol sotishni ma’qulladi.

Xususan, AQSH ma’muriyati Isroilga qiymati 660 million dollarlik 3000 dona AGM-114 Hellfire raketalari, shuningdek, 6,75 milliard dollarlik bombalar, o‘q-dorilar, yo‘naltiruvchi tizimlar, raketalar va tegishli jihozlarni sotishni ma’qulladi.

Shuningdek, Isroil 2166 ta kichik diametrli bombalar, 2800 ta 500 funtlik portlovchi bombalar, 13000 ta to‘g‘ridan to‘g‘ri hujum o‘q-dorilari (JDAM) ko‘rsatmalar to‘plamlari va turli toifadagi minglab bombalar va yo‘l-yo‘riq tizimlarini oladi.

Qayd etish joiz, AQSH ma’muriyatining bu tashabbusi Isroil Bosh vaziri Binyamin Netanyaxuning Vashingtonda bo‘lganiga to‘g‘ri keldi. Agar 15 kun ichida AQSH Kongressidan sotuvga to‘sqinlik qiluvchi e’tirozlar kelib tushmasa, sotishni tasdiqlash jarayoni tugallanadi.

Eslatib o‘tamiz, avvalroq  AQSH Davlat kotibi Marko Rubio Prezident Donald Tramp tomonidan taklif etilgan va keng qoralangan G‘azo aholisini ko‘chirish rejasidan so‘ng fevral oyining o‘rtalarida Yaqin Sharqqa borishi haqida xabar berilgandi.

Mohimbegim Ma’rufaliyeva