AQSH ishchi vizasiga da’vogarlarning profillari tekshirilmoqda

AQSH Davlat departamenti mehnat vizasiga murojaat qilganlarning LinkedIn sahifalarini ko‘rib chiqishni buyurdi. Nafaqat arizachining, balki boshqa joyga ko‘chib o‘tishga intilayotgan oila a’zolarining ham hisoblari tekshiriladi. Bu haqda “Reuters” xabar berdi.

Qayd etilishicha, AQSH Davlat departamenti konsullik xodimlariga H-1B ishchi vizasiga da’vogarlarning rezyumelari va LinkedIn profillarini ko‘rib chiqishni hamda so‘z erkinligini senzura qilish bilan bog‘liq bo‘lganlarning arizalarini rad etishni talab qiluvchi eslatma yubordi. 

O‘zgartirish barcha ishchi vizalariga taalluqlidir, ammo Davlat departamenti H-1B vizasiga alohida e’tibor qaratdi, chunki bu tur texnologiya sohasida talabga ega.

Endi AQSH diplomatik vakolatxonalari vizaga murojaat etuvchilar dezinformatsiyani tarqatish, kontentni moderatsiya qilish, faktlarni tekshirish yoki internet xavfsizligi kabi sohalarda ishlagan-ishlamaganligini aniqlaydi. Nafaqat arizachining, balki AQSHga immigratsiya qilmoqchi bo‘lgan ularning oila a’zolarining ham profillari tekshiriladi.

“Agar siz ariza berayotgan shaxs AQSHda biror fikrni yoki erkin ifodani bostirishda qatnashganini ko‘rsatuvchi dalillar topsangiz, unga viza berilmasligi uchun choralar ko‘rishingiz kerak.”

Sentyabr oyida AQSH H-1B vizasi uchun to‘lovni 100 ming dollargacha oshirdi. H-1B vizasi yuqori malakali mutaxassislar uchun mo‘ljallangan bo‘lib, u AQSH kompaniyasidan ish taklifi olgan yuqori ixtisoslashgan ishchilar uchun mavjud. Ilgari kompaniyalar talab qilinadigan xorijlik mutaxassislar uchun ariza topshirishga taxminan 1500 dollar sarflagan bo‘lsa, sentyabr oyida to‘lov 100 ming dollarga ko‘tarildi.

“Kompaniya bir kishi hukumatga yiliga 100 ming dollar to‘lash uchun qimmatli bo‘ladimi yoki u uyiga borib, uning o‘rniga amerikalikni yollashi kerakmi, degan qarorga kelishi kerak”, dedi AQSH Savdo vaziri Govard Lutnik to‘lovning oshishiga izoh berar ekan.

Xabarda yozilishicha, AQSH Prezidenti Donal’d Tramp imzolagan farmon Vashington va Nyu-Dehli o‘rtasidagi munosabatlarga sezilarli ta’sir ko‘rsatishi mumkin, chunki 2024 yilda H-1B dasturi bo‘yicha tasdiqlangan arizalarning 71 foizi Hindiston fuqarolari uchun bo‘lgan.

Ma’lumot o‘rnida, AQSH avvalroq Yevropani senzurada ayblagan edi. Tramp 2025 yil yanvarida Oq uyga qaytganidan beri Amerika rasmiylari Yevropa davlatlarini bir necha bor senzura va so‘z erkinligini buzishda aybladi. Fevral oyida vitse-prezident Jeyms Devid Vens Myunxen xavfsizlik konferentsiyasida shunday tanqidni aytdi va iyul oyida Davlat departamenti Yevropa Ittifoqining raqamli xizmatlar to‘g‘risidagi qonunini “Oruell” senzurasi bilan taqqosladi. 

Bundan tashqari, sentyabr oyida Davlat departamenti Yevropa davlatlariga Jo Bayden davrida imzolangan o‘zaro anglashuv memorandumlarini bekor qilish to‘g‘risida xabar yubordi, bu ularga Rossiya, Xitoy va Eron tomonidan tarqalgan dezinformatsiyani aniqlash va rad etish imkonini berdi.

Eslatib o‘tamiz, oldinroq AQSH Prezidenti Donald Tramp ma’muriyati Vashington milliy xavfsizlikka tahdid, deb hisoblagan 19 davlat fuqarolarining barcha immigratsiya arizalarini ko‘rib chiqishni vaqtincha to‘xtatgani haqida xabar berilgandi.