AQSH Eron hujumlaridan keyin arsenallarni to‘ldirish uchun 1,2 mlrd dollar sarflaydi – “Bloomberg”

Pentagonga Qizil dengizga joylashtirilgan harbiy kemalarni saqlash hamda Eron va Yamandagi husiylar hujumlarini to‘xtatish uchun foydalaniladigan raketalarni to‘ldirish uchun taxminan 1,2 milliard dollar kerak bo‘ladi. Bu haqda byudjet hujjatlariga tayanib, “Bloomberg” xabar berdi.

Qayd etilishicha, 300 million dollar AQSH harbiy-dengiz kuchlarining USS Bataan amfibiya hujum kemasi va Qizil dengizda operatsiya o‘tkazgan Eisenhower tashuvchisi zarba berish guruhining kemalariga rejadan tashqari texnik xizmat ko‘rsatishga sarflanadi.

Bundan tashqari, AQSH mudofaa vazirligi qo‘shimcha SM-6 ballistik raketalarini sotib olish uchun 276 million dollar va Tomahawk qanotli raketalarini xarid qilish uchun 57,3 million dollar talab qilmoqda.

So‘rov “AQSH Markaziy qo‘mondonligining Isroildagi vaziyat yoki mintaqadagi Isroildagi vaziyat bilan bevosita bog‘liq bo‘lgan dushmanlik harakatlari bilan bog‘liq mas’uliyat hududidagi mudofaa departamenti xarajatlariga” taalluqlidir.

Eslatib o‘tamiz, Eron 1 oktyabr kuni Isroilga yirik raketa hujumi uyushtirgandi. Islom inqilobi qo‘riqchilari korpusi hujum Isroil tomonidan HAMAS, “Hizbulloh” yetakchilari va Livandagi Eron qo‘mondoni o‘ldirilishiga javob bo‘lganini e’lon qildi. Isroil matbuotiga ko‘ra, Eron Isroilga 200 ga yaqin raketa uchirdi. 1 oktyabr kuni Iordaniya AQSH kuchlariga arab mamlakati havo hududida Eron raketalarini urib tushirishga ruxsat bergandi.