Aguero yuragidagi muammolari sabab faoliyatini yakunladi

Bugun, 15 dekabr kuni “Barselona” hujumchisi Serxio Aguero 33 yoshida professional faoliyatini yakunladi, bu haqda forvard klub vakillari ishtirokida o‘tkazilgan matbuot anjumanida aytib o‘tdi. 

Ma’lum bo‘lishicha, argentinalik futbolchi yurakdagi muammolar tufayli shunday qarorga kelgan. Matbuot anjumani davomida Aguero uzoq vaqt ko‘z yoshlarini tiya olmadi.

Eslatib o‘tamiz, hujumchi Ispaniya chempionatining 12-turidan o‘rin olgan “Alaves”ga (1:1) qarshi o‘yinning birinchi bo‘limida taxikardiya tufayli almashtirilgan edi. O‘shanda futbolchi ehtiyot chorasi sifatida almashtirilgan edi. O‘yindan so‘ng, Aguero o‘zini yaxshi his qilayotganinini ta’kidlagan edi. Keyinchalik malum bo‘lishicha, forvard yuragi bilan bog‘liq muammolar tufayli kamida uch oy maydonga tusha olmasligi xabar qilindi.

Ma’lumot uchun, 33 yoshli argentinalik futbolchi joriy yilning iyul oyida “Manchester Siti”dan erkin agent sifatida “Barselona”ga ko‘chib o‘tgandi. U “ko‘k-anorranglilar” safida La liga doirasida 3 ta o‘yin o‘tkazib, “Real Madrid”ga qarshi kechgan “El klasiko”da raqib darvozasini ishg‘ol etgan edi.