Agar Bayden AQSH saylovlarida g‘alaba qozonsa, Rossiya uchun yaxshi bo‘ladi – Putin
Olam
−
15 fevral
11755Rossiya rahbari Vladimir Putin Moskva AQSH Prezidenti lavozimiga Donald Trampdan ko‘ra Jo Baydenni afzal ko‘rishini aytdi. Bu haqda u jurnalist Pavel Zarubin bilan suhbatda so‘z ochdi.
Zarubin Putindan "Biz uchun kim yaxshiroq, Bayden yoki Tramp?" deya so‘ragan.
“Bayden. U tajribaliroq, oldindan aytish mumkin, eski formatsiya siyosatchisi. Ammo biz Amerika xalqi ishonadigan har qanday AQSH rahbari bilan hamkorlik qilamiz”, deb javob bergan Putin.
Rossiya Prezidentidan Baydenning sog‘lig‘i haqidagi xabarlarga qanday munosabatda ekani ham so‘ralgan.
Putinning so‘zlariga ko‘ra, bunga AQSHdagi saylov kampaniyasi sabab bo‘lmoqda.
“Menimcha, AQSHda ichki siyosiy kampaniya, saylov kampaniyasi tobora kuchayib bormoqda. U tobora o‘tkir shaklga kirmoqda. Biz esa bu jarayonga aralashishimiz noo‘rin. Qarang, men uch yil oldin Bayden bilan Shveysariyada uchrashganman. O‘shanda ham uni layoqatsiz deyishardi. Men shunga o‘xshash narsani ko‘rmadim. U qog‘oziga qaradi, men o‘zimnikiga qaradim. Vertolyotdan tushayotib, boshini urganiga kelsak. Axir kim ham boshini qayoqqadir urib olmagan?”deydi Prezident.
Uning qo‘shimcha qilishicha, AQSH ma’muriyatining hozirgi pozitsiyasi juda zararli va noto‘g‘ri.
“Bu haqda men bir paytlar Prezident Baydenga aytganman”, deya xulosa qilgan Putin.