Afg‘on-tojik chegarasidagi vaziyat taranglashdi. Imomali Rahmon xavotirda

Tojik-afg‘on chegarasining butun perimetri bo‘ylab vaziyat yanada murakkablashdi. Bu haqda bugun, 14 oktyabr kuni Tojikiston Prezidenti Imomali Rahmon “Markaziy Osiyo-Rossiya” sammitida aytib o‘tdi.

Imomali Rahmonning ta’kidlashicha, Markaziy Osiyoda giyohvand moddalar va qurol-yarog‘ aylanmasi sezilarli darajada oshgan. Unga ko‘ra, Tojikiston yaqinida keskinlikni kuchaytirish uchun ko‘priklar yaratilmoqda.

“Tojik-afg‘on chegarasining butun perimetri bo‘ylab vaziyat yanada murakkablashdi. Mintaqamizda giyohvandlik vositalari va qurol-yarog‘ ayirboshlash ko‘p marta oshdi. Bizning yaqin atrofimizda radikal ekstremistik mafkuraning kuchayishi uchun tramplin yaratilmoqda”, deydi Tojikiston rahbari.

Shuningdek, u Tojikiston Afg‘onistonga gumanitar yordam ko‘rsatish uchun infratuzilmani taqdim etishga tayyorligini aytdi. Rasmiy Dushanbe Rossiya Federatsiyasining Markaziy Osiyoda olti tomonlama hamkorlikni yo‘lga qo‘yish tashabbusini olqishlaydi.

“Tojikiston eng yaqin qo‘shni sifatida Afg‘onistonni terrorizm, urushlar va giyohvand moddalardan xoli tinch davlat sifatida shakllantirish tarafdori bo‘lgan va bo‘lib keladi. Biz Afg‘oniston xalqiga maqsadli insonparvarlik yordamini yetkazish uchun barcha manfaatdor mamlakatlarga chegara infratuzilmamiz va logistika imkoniyatlarini taqdim etamiz”, deydi Imomali Rahmon.

Rahmon, shuningdek, Tojikiston Markaziy Osiyo va Rossiya Federatsiyasi o‘rtasida xavfsizlik sohasida hamkorlik qilish tarafdori ekanini aytdi.

“Bu borada biz mamlakatlarimiz salohiyatini mustahkamlash va shu tariqa “Afg‘on omili”ning mintaqa xavfsizligiga salbiy ta’sirini bartaraf etish uchun bir-birimizga yordam ko‘rsatish borasida amaliy hamkorlik tarafdorimiz”, degan u.

Uning so‘zlariga ko‘ra, jangarilarni yollash kanallari masalasida mintaqa davlatlari va Rossiya Federatsiyasi maxsus xizmatlari hamkorlik qilishi zarur.

“Biz yollash kanallarini aniqlash va hibsga olishda yaqinroq hamkorlikni yo‘lga qo‘yishimiz kerak. Biz mintaqada radikallashuv tarqalishiga qarshi birgalikda kurashishning mavjud mexanizmlarini ishlab chiqish va yangi mexanizmlarni yaratish maqsadida maxsus xizmatlar va vakolatli organlar o‘rtasidagi muvofiqlashtirishni kuchaytirish tarafdorimiz”, deydi Rahmon “Markaziy Osiyo-Rossiya” sammitida so‘zlagan nutqida.

Ma’lumot uchun, “Markaziy Osiyo-Rossiya” formatidagi sammit bugun, 14 oktyabr kuni birinchi marta Ostona shahrida o‘tkazildi.