Adabiyotshunos olim Naim Karimov vafot etdi

Akademik, adabiyotshunos olim Naim Karimov vafot etdi. Bu haqda O‘zbekiston Yozuvchilar uyushmasi xabar berdi.

“O‘zbekiston Yozuvchilar uyushmasi jamoasi akademik, adabiyotshunos olim, uyushma a’zosi Naim Karimovning vafoti munosabati bilan marhumning oilasi va yaqinlariga chuqur hamdardlik bildiradi”, deyiladi xabarda.

Naim Karimov 1932 yil 12 dekabr kuni Toshkentda tug‘ilgan. U 1955 yilda hozirgi O‘zbekiston Milliy universitetining filologiya fakultetini tamomlagan. Naim Karimov Hamza, Fitrat, Cho‘lpon va boshqalar ijodi haqidagi kitob, maqolalar muallifidir. Naim Karimov mustamlakachilik davri qurbonlari xotirasini abadiylashtirish bo‘yicha jamoatchilik komissiyasi raisi (1999 yildan beri) sifatida Toshkentda Shahidlar xotirasi yodgorlik majmuasini bunyod etish, shuningdek Qatag‘on qurbonlari muzeyini tashkil qilishda jamoatchilik ishlarini amalga oshirgan.

Akademik 1994 yilda professor unvonini olgan bo‘lsa, 1996 yilda O‘zbekiston Davlat fan arbobi bo‘lgan. 2022 yilda esa “Birinchi darajali davlat mukofoti"ni qo‘lga kiritgan.