Abduqodir Husanov O‘zbekistonning eng qimmat futbolchisiga aylandi

Kecha, 10 dekabr kuni Fransiya chempionatida to‘p tepuvchi futbolchilarning transfer narxi yangilandi va o‘zbekistonlik futbolchi Abduqodir Husanovning transfer narxi 12 million yevrogacha ko‘tarildi. 

Yevropaning bir nechta top klublari qiziqish bildirayotgan 20 yoshli himoyachining avvalgi transfer narxi 5 million yevroni tashkil etayotgandi.

Shunday qilib, Husanov Abbosbek Fayzullayevni ortda qoldirib, O‘zbekistonning eng qimmat futbolchisiga aylandi. Fayzullayevning transfer qiymati 6 million yevroga baholangan.

Qayd etish joiz, shu vaqtga qadar “Transfermarkt” portalida qiymati eng ko‘p ko‘tarilgan futbolchi Vitaliy Denisov bo‘lgan. O‘zbekiston terma jamoasi sobiq himoyachisining qiymati o‘z vaqtida 7 million yevrogacha ko‘tarilgan. 

Shuningdek, “Transfermarkt” tomonidan O‘zbekiston chempionatida to‘p tepuvchi futbolchilarning ham qiymati yangilandi va yangilangan narxlarga ko‘ra, “Nasaf” posboni Abduvohid Ne’matov 1,5 million yevrolik qiymat bilan O‘zbekiston chempionatida to‘p tepayotgan eng qimmat futbolchiga aylandi.