Islom Abdug‘aniyevich “O‘zbekgidroenergo” AJga raisi bo‘ldi

Islom Abdug‘aniyevich Abdurahmonov “O‘zbekgidroenergo” AJ boshqaruv raisi etib tayinlandi. Bu haqda kompaniya matbuot xizmati xabar berdi.

Qayd etilishicha, kecha, 8 yanvar kuni “O‘zbekgidroenergo” aksiyadorlik jamiyatida aksiyadorlarning navbatdan tashqari umumiy yig‘ilishi o‘tkazilgan. Unda aksiyadorlar tomonidan Islom Abdug‘aniyevich Abdurahmonovni “O‘zbekgidroenergo” AJ boshqaruv raisi lavozimiga tayinlash va Abdurahmonov bilan 3 yil muddatga mehnat shartnomasini tuzish to‘g‘risida qaror qabul qilingan.

Qayd etish joiz, Islom Abdurahmonov kompaniyaning sobiq rahbari Abdug‘ani Abdurahmonovich Sanginovning o‘g‘li hisoblanadi. Ma’lumotlarga ko‘ra, Islom Abdurahmonov 2020 yil may oyida fojia yuz vergan Sardoba suv omborini qurishda qatnashgan kompaniyalardan birining asosiy ulushdori hisoblanadi. Xususan, korxonalar va tashkilotlarning yagona davlat reyestr ma’lumotlariga ko‘ra, To‘palang HPD Holding'ning 61,7 foiz ulush Islom Abdurahmonovga tegishli.

Eslatib o‘tamiz, avvalroq Abdug‘ani Abdurahmonovich Sanginov “O‘zbekneftgaz” aksiyadorlik jamiyati boshqaruv raisi etib tayinlangandi. Abdug‘ani Sanginov 2017 yilning mayida “O‘zbekgidroenergo” kompaniyasi raisi etib tayinlangan. U 2020 yilda Surxondayo viloyatidan Oliy Majlis Senatiga saylangan.