5 yoshli qizchani zo‘rlab o‘ldirgan erkakka hukm o‘qildi (video)

Qozog‘istonning Turkiston viloyatida 5 yoshli qizchani zo‘rlab o‘ldirgan erkak umrbod qamoq jazosi va kimyoviy kastratsiyaga hukm qilindi. Bu haqda “Zakon.kz” xabar berdi.

Ma’lum qilinishicha, joriy yilning 13 iyul kuni soat taxminan 13:00 lar atrofida Turkiston viloyatida yashovchi E.N. ismli 5 yashar qizcha yo‘qolib qolgan. Shu kuni E.N. ning onasi bergan ariza asosida qidiruv ishlari olib borilgan, uni qidirishga deyarli butun qishloq aholisi yordam bergan. 

“Shu kuni qizchaning jasadi zo‘rlash alomatlari bilan topilgan. Jibek jola qishlog‘ining deyarli barcha aholisi qizchani qidirishda ishtirok etdi. Dahshatli jinoyatda gumonlanuvchi ham qishloq aholisi tomonidan aniqlandi”, deyiladi xabarda.

Unga ko‘ra, jinoyatni muqaddam qotillikda ayblanib 10 yilga qamalgan va sog‘lig‘idagi muammo sabab shartli ravishda ozod qilingan xavfli retsidivist sodir etgan. Sud hukmi bilan unga nisbatan umrbod qamoq va kimyoviy kastratsiya jazosi tayinlangan. Shuningdek, u marhumning oilasiga 100 million tenge (214,9 ming dollar) ma’naviy zararni ham to‘lab berishi belgilangan.

Eslatib o‘tamiz, avvalroq Tojikiston poytaxti Dushanbe shahrida 8 yoshli qizni zo‘rlab, o‘ldirgan shaxs bir umrga qamalgani haqida xabar bergan edik.