Erdo‘g‘anning saylovdagi raqibi Qilichdoro‘g‘lining korteji YTHga uchradi (video)

Joriy yilning may oyida Turkiyada o‘tkazilgan prezidentlik saylovida amaldagi Prezident Rajab Toyib Erdo‘g‘anga qarshi nomzodini qo‘ygan Kamol Qilichdoro‘g‘lining korteji bugun, 5 avgust kuni halokatga uchradi. Bu haqda “SonDakika” xabar berdi. 

Qayd etilishicha, Turkiyaning Tunjeli hududida, Erzinjon-Tunjeli yo‘lida Qilichdoro‘g‘lining avtomobili harakatlanayotgan kortejdagi 7 ta mashina ishtirokida yo‘l-transport hodisasi yuz bergan. Avtomobil karvonida ketayotgan mikroavtobus YTH natijasida zarar ko‘rgan. Hodisa oqibatida mikroavtobusdagi 4 nafar yo‘lovchi jarohatlangan, ulardan ikki nafari jurnalistlar bo‘lgan. 

Hozircha voqeaning boshqa tafsilotlari ochiqlanmadi. YTHda Qilchdoro‘g‘liga zarar yetgan yoki yo‘qligi ham hozircha ma’lum emas.

Eslatib o‘tamiz, shu yilning 28-may kuni bo‘lib o‘tgan Turkiya prezidentlik saylovining ikkinchi turida amaldagi prezident Erdo‘g‘an 52,8 foiz ovoz bilan g‘alaba qozongan, 47,9 foiz ovoz to‘plagan Qilichdoro‘g‘li esa undan biroz ortda qolgan edi. Keyinroq CHP raisi unga qarshi qo‘zg‘atilgan 28 ta da’vo ishi bo‘yicha 110 yilga qamalishi mumkinligi ma’lum qilingandi.