Pashinyan Putin tomon oshiqmoqda. Kremlda Qorabog‘ muhokama qilinadi

Ertaga, 12 oktyabr kuni Rossiya poytaxti Moskvada mamlakat Prezidenti Vladimir Putin Armaniston Bosh vaziri Nikol Pashinyan bilan Tog‘li Qorabog‘ bo‘yicha qabul qilingan uch tomonlama (Ozarbayjon, Rossiya, Armaniston) bayonotning bajarilishini muhokama qiladi. Bu haqda Kreml Matbuot xizmati ma’lum qildi.

“12 oktyabr kuni Moskvada Rossiya Prezidenti Vladimir Putin va Armaniston Respublikasi Bosh vaziri Nikol Pashinyan o‘rtasida muzokaralar bo‘lib o‘tadi. Muzokara jarayonida Rossiya, Armaniston va Ozarbayjon rahbarlarining Tog‘li Qorabog‘ bo‘yicha noyabr oyidagi bayonotlari ijrosini ko‘rib chiqish rejalashtirilgan” deyiladi xabarda.

Shuningdek, ertangi muzokarada Rossiya Prezidenti hamda Armaniston hukumati boshlig‘i Yevroosiyo makonidagi ikki tomonlama aloqalar va integratsion uyushmalardagi o‘zaro munosabatlarni rivojlantirishning dolzarb masalalarini muhokama qiladi.

Qorabog‘ mojarosi

2020 yilning 27 sentyabr kuni Ozarbayjon va Armaniston o‘rtasidagi Qorabog‘ urushi qayta olovlandi. 

Rasmiy Bakuga ko‘ra, Armaniston Qurolli Kuchlari 2020 yilning 27 sentyabr kuni soat 06:00 dan boshlab Ozarbayjonga qarshi keng ko‘lamli provokatsiyalarni amalga oshirdi, butun front bo‘ylab Ozarbayjon armiyasining pozitsiyalarini, shuningdek, oldingi chiziq zonasida joylashgan aholi punktlarini o‘qqa tutdi.

Armaniston hujum Ozarbayjon qurolli kuchlari tomonidan boshlanganini aytdi. Ozarbayjon esa qurolli to‘qnashuvga nisbatan javob hujumlari boshlaganini rasman e’lon qilib, Armaniston chegarasidagi tinch aholi vakillarini chegara hududlaridan chetga chiqishlarini so‘radi.

Holat bo‘yicha Ozarbayjon Respublikasi Prezidenti Ilhom Aliyev xalqqa murojaat bilan chiqib, to‘qnashuv Ozarbayjonning provokatsiyasi emasligini aytdi.

Nikol Pashinyan esa mamlakatda harbiy holat va umumiy safarbarlik e’lon qildi.  Buning ortidan Ilhom Aliyev mamlakatda harbiy holat va komendantlik soati e’lon qilish haqidagi farmonga imzo chekdi. Shuningdek, Aliyev 28 sentyabr kuni qisman safarbarlik e’lon qilish haqidagi hujjatni imzoladi. 

Noyabr oyiga kelib Ozarbayjon Qurolli Kuchlari Tog‘li Qorabog‘dagi muhim hududlarni, jumladan strategik jihatdan ahamiyatli bo‘lgan Shusha shahrini o‘z nazorati ostiga oldi. Ushbu harbiy harakatlar 2020 yilning 9 noyabr kuni Rossiya Federatsiyasi, Ozarbayjon Respublikasi Prezidentlari Vladimir Putin, Ilhom Aliyev va Armaniston Bosh vaziri Nikol Pashinyan o‘rtasida imzolangan qo‘shma bayonot bilan o‘z yakuniga yetdi. Sulh bitimiga ko‘ra, 10 noyabr soat 00:00 dan boshlab Qorabog‘da harbiy harakatlar butunlay to‘xtatildi, Armaniston Tog‘li Qorabog‘dagi 3 ta hududni Ozarbayjonga qaytarish majburiyatini oldi.