Shavkat Mirziyoyev Qozog‘iston Prezidenti bilan telefon orqali muloqot qildi

O‘zbekiston Respublikasi Prezidenti Shavkat Mirziyoyev bugun, 20 mart kuni Qozog‘iston Respublikasi Prezidenti Qosim-Jomart Toqayev bilan telefon orqali muloqot qildi.

Suhbat avvalida O‘zbekiston rahbari Qosim-Jomart Toqayevni Qozog‘iston Respublikasi Prezidenti lavozimiga kirishgani munosabati bilan samimiy tabriklab, davlat rahbari lavozimidagi faoliyatida muvaffaqiyatlar tiladi. 

Bu Qozog‘istonning atoqli o‘g‘loni, Birinchi Prezidenti Nursulton Abishevich Nazarboyevning, butun Qozog‘iston xalqining yangi Prezidentga ishonchi yuksak ekanining navbatdagi yorqin dalilidir.

Qardosh mamlakatlar va xalqlar o‘rtasidagi ko‘p asrlik do‘stlik va yaxshi qo‘shnichilik rishtalari izchil mustahkamlanayotgani, strategik sheriklik munosabatlari yangi bosqichda rivojlanib, ko‘p qirrali amaliy hamkorlik kengayib borayotgani katta mamnuniyat bilan qayd etildi.

Qozog‘istonda O‘zbekiston yili deb e’lon qilingan o‘tgan yilda tovar ayirboshlashning rekord ko‘rsatkichlariga erishildi, iqtisodiyotning turli tarmoqlarida yangi kooperatsiya loyihalari amalga oshirildi, ikki mamlakat biznesi va hududlari darajasidagi muloqot, jumladan, madaniy-gumanitar almashinuvlar faollashdi.

Joriy yilda O‘zbekistonda o‘tkaziladigan Qozog‘iston yili doirasida tadbirlarga boy qo‘shma reja qabul qilindi.

Muloqotda davlat rahbarlari oliy darajada erishilgan kelishuvlarni keng miqyosda amalga oshirish muhim ekanini qayd etdilar.

Mintaqaviy va xalqaro siyosatning dolzarb masalalari yuzasidan ham fikr almashildi.

Qozog‘iston Respublikasi Prezidenti Qosim-Jomart Toqayev samimiy tilaklar uchun chuqur minnatdorlik bildirdi va oliy darajadagi faol muloqotni davom ettirishga tayyor ekanini ta’kidladi.

Muloqot so‘ngida davlat rahbarlari bahor ayyomi – Navro‘z munosabati bilan bir-birlarini samimiy qutlab, do‘stlik, yaxshi qo‘shnichilik va o‘zaro ishonch ruhidagi munosabatlarni mustahkamlash, shuningdek, qardosh mamlakatlarimiz va xalqlarimiz farovonligi, butun mintaqa tinchligi va ravnaqi yo‘lida keng ko‘lamli hamkorlikni rivojlantirish borasida intilishlari qat’iy ekanini tasdiqladilar.

Eslatib o‘tamiz, kecha, 19 mart kuni mamlakatni 30 yil davomida boshqarib kelgan Nursulton Nazarboyev o‘z iste’fosini e’lon qildi va Prezident vakolatlari Senat raisi Qosim-Jomart Toqayevga o‘tdi. Bugun, 20 mart kuni Qosim-Jomart Toqayev Prezident sifatida qasamyod qabul qildi. Senat raisi lavozimini esa Nazarboyevning qizi Darig‘a Nazarboyeva egalladi.