Husanovning finaldagi o‘yini qanday baholandi?

Kecha, 22 mart kuni Londondagi “Uembli” stadionida “Arsenal” va “Manchester Siti” jamoalari o‘rtasida Angliya Liga kubogi final bahsi bo‘lib o‘tdi. Uchrashuvda Gvardiola boshchiligidagi shaharliklar 2:0 hisobida ishonchli g‘alabaga erishib, navbatdagi sovrinni qo‘lga kiritdi.

Uchrashuvning birinchi bo‘limida hisob ochilmadi. O‘yin taqdiri ikkinchi bo‘limdagi gollar evaziga hal bo‘ldi. Bahsning 60 va 64-daqiqalarida jamoaning yosh yulduzi Niko O’Rayli dublni rasmiylashtirib, raqib mudofaasini dog‘da qoldirdi. Shu tariqa, Husanovning jamoasi o‘z tarixida 9 marta ushbu kubokni boshi uzra ko‘tardi.

Ushbu finalda O‘zbekiston milliy terma jamoasi himoyachisi Abduqodir Husanov to‘liq 90 daqiqa harakat qildi. U markaziy himoyada ishonchli va intizomli o‘yin namoyish etib, jamoa g‘alabasiga munosib hissa qo‘shdi.

“SofaScore” platformasi Husanovga 7.0, “FlashScore” 6.6, “WhoScored” 7.01 va “FotMob” 7.4 ball qo‘ydi.