Ҳусановнинг финалдаги ўйини қандай баҳоланди?

Кеча, 22 март куни Лондондаги “Уэмбли” стадионида “Арсенал” ва “Манчестер Сити” жамоалари ўртасида Англия Лига кубоги финал баҳси бўлиб ўтди. Учрашувда Гвардиола бошчилигидаги шаҳарликлар 2:0 ҳисобида ишончли ғалабага эришиб, навбатдаги совринни қўлга киритди.

Учрашувнинг биринчи бўлимида ҳисоб очилмади. Ўйин тақдири иккинчи бўлимдаги голлар эвазига ҳал бўлди. Баҳснинг 60 ва 64-дақиқаларида жамоанинг ёш юлдузи Нико О’Райли дублни расмийлаштириб, рақиб мудофаасини доғда қолдирди. Шу тариқа, Ҳусановнинг жамоаси ўз тарихида 9 марта ушбу кубокни боши узра кўтарди.

Ушбу финалда Ўзбекистон миллий терма жамоаси ҳимоячиси Абдуқодир Ҳусанов тўлиқ 90 дақиқа ҳаракат қилди. У марказий ҳимояда ишончли ва интизомли ўйин намойиш этиб, жамоа ғалабасига муносиб ҳисса қўшди.

“SofaScore” платформаси Ҳусановга 7.0, “FlashScore” 6.6, “WhoScored” 7.01 ва “FotMob” 7.4 балл қўйди.