Husanov transferida kim favorit?

O‘zbekiston milliy terma jamoasi va Fransiyaning “Lans” klubi himoyachisi Abduqodir Husanov transferida Angliyaning "Manchester Siti" klubi favoritlik qilmoqda. Bu haqda futbol jurnalisti Fabritsio Romano X sahifasida ma’lum qildi.

Manbaga ko‘ra, “Manchester Siti” Abduqodir Husanov transferi bo‘yicha aloqalarni faol davom ettirmoqda. “Lans”, futbolchi va ingliz klubi tomonidan muzokaralar boshlangan.

“Hali oldinda ko‘plab qadamlar bor, sababi unga ko‘plab klublar qiziqmoqda”, deyiladi manba xabarida.

Ma’lumotlarga ko‘ra, shaxsan Pep Gvardiolaning o‘zi 20 yoshli himoyachini “shaharliklar” safida ko‘rishni istamoqda. Angliya klubi vakillari Husanov uchun 20 million yevro sarflamoqchi. “Lans” klubi rahbariyati ham o‘zbekistonlik futbolchini yanvar oyida boshqa klubga o‘tishini tasdiqladi.

Ma’lumot uchun, Husanov joriy mavsum “Lans” safida 16 ta o‘yinda maydonga tushib, o‘z nomiga 1 ta assist yozdirib qo‘ydi. “Transfermarkt” portaliga ko‘ra, uning qiymati 12 million yevroni tashkil etadi.