Hokimlarning yer ajratish to‘g‘risdiagi qarorlari xatlovdan o‘tkaziladi

Mahalliy vakillik va ijroiya hokimiyati organlarining yer uchastkalari berish haqidagi qarorlari yillar kesimida xatlovdan o‘tkaziladi. Bu haqda O‘zbekiston Prezidentining “Yer uchastkalaridan foydalanishda davlat nazorati samaradorligini oshirish chora-tadbirlari to‘g‘risida”gi qarorida belgilangan.

Yer uchastkalari berish haqidagi qarorlari quyidagi grafik asosida xatlovdan o‘tkaziladi:

• 2022 yil 1 maygacha – 2016–2021 yillarda qabul qilingan qarorlar;
• 2022 yil 1 avgustgacha – 2006–2015 yillarda qabul qilingan qarorlar;
• 2023 yil 1 yanvargacha – 2006 yilgacha qabul qilingan qarorlar.

Qarorga ko‘ra:

• Qishloq xo‘jaligi vazirligi ekin yerlaridan oqilona va samarali foydalanilishi, rejadagi ekinlarning ekilishi va parvarishlanishi ahvoli bo‘yicha har chorakda kamida bir marotaba monitoring o‘tkazadi;
• Kadastr agentligi barcha turdagi yer uchastkalari hamda bino-inshootlarga bo‘lgan huquqlarni davlat ro‘yxatidan o‘tkazmaslik holatlarini aniqlash, yer uchastkalarining o‘zboshimchalik bilan egallab olinishiga va chegaralarini o‘zboshimchalik bilan o‘zgartirishga yo‘l qo‘ymaslik choralarini ko‘radi.

Avvalroq Bosh prokuraturada Yer resurslari talon-toroj qilinishining oldini olish boshqarmasi tashkil etilgani haqida xabar bergan edik.