Ҳокимларнинг ер ажратиш тўғрисдиаги қарорлари хатловдан ўтказилади

Маҳаллий вакиллик ва ижроия ҳокимияти органларининг ер участкалари бериш ҳақидаги қарорлари йиллар кесимида хатловдан ўтказилади. Бу ҳақда Ўзбекистон Президентининг “Ер участкаларидан фойдаланишда давлат назорати самарадорлигини ошириш чора-тадбирлари тўғрисида”ги қарорида белгиланган.

Ер участкалари бериш ҳақидаги қарорлари қуйидаги график асосида хатловдан ўтказилади:

• 2022 йил 1 майгача – 2016–2021 йилларда қабул қилинган қарорлар;
• 2022 йил 1 августгача – 2006–2015 йилларда қабул қилинган қарорлар;
• 2023 йил 1 январгача – 2006 йилгача қабул қилинган қарорлар.

Қарорга кўра:

• Қишлоқ хўжалиги вазирлиги экин ерларидан оқилона ва самарали фойдаланилиши, режадаги экинларнинг экилиши ва парваришланиши аҳволи бўйича ҳар чоракда камида бир маротаба мониторинг ўтказади;
• Кадастр агентлиги барча турдаги ер участкалари ҳамда бино-иншоотларга бўлган ҳуқуқларни давлат рўйхатидан ўтказмаслик ҳолатларини аниқлаш, ер участкаларининг ўзбошимчалик билан эгаллаб олинишига ва чегараларини ўзбошимчалик билан ўзгартиришга йўл қўймаслик чораларини кўради.

Аввалроқ Бош прокуратурада Ер ресурслари талон-торож қилинишининг олдини олиш бошқармаси ташкил этилгани ҳақида хабар берган эдик.