Hindistonda kuchukcha 67 odamni ko‘chkidan qutqarib qoldi

Hindistonning Siyati qishlog‘ida it butun qishloqni vayron qilgan ko‘chkidan 67 kishini qutqarib qoldi. Bu haqda “The Independent” xabar berdi.

Hodisa 30 iyunga o‘tar kechasi Ximachal-Pradesh shtatining Mandi tumanida sodir bo‘lgan. Kechasi besh oylik kuchukcha to‘satdan juda baland ovozda qichqira boshlagan.

It va mahalliy aholining harakati tufayli 20 ga yaqin oila o‘z vaqtida uyini tark etishga muvaffaq bo‘lgan. Shundan so‘ng darhol qishloqqa ko‘chki tushgan. Qutqarilgan barcha qishloq aholisi vaqtinchalik boshpana, Naina Devi ibodatxonasiga joylashtirilgan. Davlat organlari har bir jabrlangan oilaga 10 ming hind rupiysi ajratgan.

Atigi ikki hafta ichida Mandi tumanida kuchli yog‘ingarchilik kuzatildi, bu esa ko‘chkilarni keltirib chiqardi. Tabiiy ofat tufayli 150 dan ortiq yo‘l yopilgan, yuzlab uylar vayron bo‘lgan. NDTV telekanali ma’lumotlariga ko‘ra, iyul oyi boshida Ximachal-Pradeshda ko‘chki va suv toshqinlari oqibatida kamida 50 kishi halok bo‘lgan.

Ximachal-Pradeshdagi musson mavsumi iyun oyining oxiridan sentyabrgacha davom etadi, bu vaqtda yillik yog‘ingarchilikning ko‘p qismi tushadi. Mutaxassislarning aytishicha, yog‘ingarchilikning ko‘payishi iqlim o‘zgarishi, iliq havo namlikni ko‘proq ushlab turishi, jala ko‘payishi va tog‘li hududlarda ko‘chkilar xavfi mavjudligi bilan bog‘liq.

Bunday ofatlar qo‘shni mamlakatlarda ham sodir bo‘lmoqda. Nepalda tog‘ yonidagi daryo Xitoy bilan chegaradagi yirik ko‘prikni vayron qildi, oqibatda kamida 18 kishi halok bo‘ldi. Xitoyda kuchli suv toshqinlari oqibatida 11 kishi bedarak yo‘qolgan. Shu bilan birga, Janubi-G‘arbiy Osiyo mintaqalari Tayvanga allaqachon zarba bergan, ikki kishining hayotiga zomin bo‘lgan, 330 nafarini jarohatlagan “Danas” to‘foniga tayyorgarlik ko‘rmoqda.

Eslatib o‘tamiz, avvalroq AQSHning Texas shtatidagi oltita okrugda kuchli suv toshqinlari oqibatida halok bo‘lganlar soni kamida 104 nafarga yetgandi.