Ҳиндистонда кучукча 67 одамни кўчкидан қутқариб қолди

Ҳиндистоннинг Сияти қишлоғида ит бутун қишлоқни вайрон қилган кўчкидан 67 кишини қутқариб қолди. Бу ҳақда “The Independent” хабар берди.

Ҳодиса 30 июнга ўтар кечаси Химачал-Прадеш штатининг Манди туманида содир бўлган. Кечаси беш ойлик кучукча тўсатдан жуда баланд овозда қичқира бошлаган.

Ит ва маҳаллий аҳолининг ҳаракати туфайли 20 га яқин оила ўз вақтида уйини тарк этишга муваффақ бўлган. Шундан сўнг дарҳол қишлоққа кўчки тушган. Қутқарилган барча қишлоқ аҳолиси вақтинчалик бошпана, Наина Деви ибодатхонасига жойлаштирилган. Давлат органлари ҳар бир жабрланган оилага 10 минг ҳинд рупийси ажратган.

Атиги икки ҳафта ичида Манди туманида кучли ёғингарчилик кузатилди, бу эса кўчкиларни келтириб чиқарди. Табиий офат туфайли 150 дан ортиқ йўл ёпилган, юзлаб уйлар вайрон бўлган. NDTV телеканали маълумотларига кўра, июль ойи бошида Химачал-Прадешда кўчки ва сув тошқинлари оқибатида камида 50 киши ҳалок бўлган.

Химачал-Прадешдаги муссон мавсуми июнь ойининг охиридан сентябргача давом этади, бу вақтда йиллик ёғингарчиликнинг кўп қисми тушади. Мутахассисларнинг айтишича, ёғингарчиликнинг кўпайиши иқлим ўзгариши, илиқ ҳаво намликни кўпроқ ушлаб туриши, жала кўпайиши ва тоғли ҳудудларда кўчкилар хавфи мавжудлиги билан боғлиқ.

Бундай офатлар қўшни мамлакатларда ҳам содир бўлмоқда. Непалда тоғ ёнидаги дарё Хитой билан чегарадаги йирик кўприкни вайрон қилди, оқибатда камида 18 киши ҳалок бўлди. Хитойда кучли сув тошқинлари оқибатида 11 киши бедарак йўқолган. Шу билан бирга, Жануби-Ғарбий Осиё минтақалари Тайванга аллақачон зарба берган, икки кишининг ҳаётига зомин бўлган, 330 нафарини жароҳатлаган “Данас” тўфонига тайёргарлик кўрмоқда.

Эслатиб ўтамиз, аввалроқ АҚШнинг Техас штатидаги олтита округда кучли сув тошқинлари оқибатида ҳалок бўлганлар сони камида 104 нафарга етганди.