Hindiston va AQSH Alyaskada qo‘shma manyovrlarni boshladi

Hindiston va AQSH harbiy xizmatchilari Alyaskada ikki haftalik manyovrlarni boshladi, mashg‘ulotlar davomida ular qo‘shma operatsiyalarni mashq qiladi. Bu haqda Hindiston Mudofaa vazirligi ma’lum qildi.

Aytilishicha, mashg‘ulotlar Nyu-Dehli va Vashington o‘rtasida xavfsizlik sohasidagi hamkorlikni faollashtirish maqsadida o‘tkaziladi.

Vazirlik ma’lumotlariga ko‘ra, Alyaskadagi Fort Ueynrayt bazasiga 350 kishilik Hindiston quruqlikdagi kuchlarining kontingenti yetib borgan. 

“Ikkala tomon BMTning tinchlikparvar operatsiyalarida o‘zaro hamkorlikni kuchaytirish uchun bir qator taktik mashqlarni bajaradi. Shuningdek, har ikki tomon qo‘shinlari ilg‘or tajriba almashish uchun batafsil muhokamalar o‘tkazadi”, deydi Hindiston Qurolli kuchlari vakili.

Mashg‘ulotlar mavzusi – Birlashgan Millatlar Tashkiloti mandatining VII bobiga muvofiq “Birlashtirilgan jangovar guruhdan tog‘li/ekstremal iqlim sharoitida foydalanish” bo‘ladi. Mashqlar 8 oktyabrga qadar davom etadi.

Ma’lumot uchun, ikki davlat hududida Hindiston-Amerika qo‘shma “Yudx abxyas” (“Jang ilmi”) manyovrlari muntazam ravishda o‘tkazib kelinmoqda. O‘tgan safar, 2022 yil noyabr oyida Hindistonning Uttarakxand shtatidagi Auli tog‘li hududida shunday qo‘shma mashg‘ulotlar bo‘lib o‘tgan.

Eslatib o‘tamiz, joriy yilning 31 avgustidan 14 sentyabriga qadar Misr shimolida joylashgan Muhammad Nagib yirik harbiy bazasi, shuningdek, Respublikaning boshqa bir qancha havo kuchlari va dengiz floti bazalarida 34 davlat, xususan AQSH ishtirokida “Bright Star 2023” qo‘shma mashqlari bo‘lib o‘tgandi. Unda 19 davlatdan 8 mingdan ortiq harbiy xizmatchi, yana 15 davlat vakillari kuzatuvchi maqomida qatnashgan.