Hindiston harbiy dronlar ishlab chiqarishda Xitoy qismlaridan foydalanishni taqiqladi

Hindiston so‘nggi oylarda mahalliy harbiy dron ishlab chiqaruvchilariga xavfsizlikni ta’minlash maqsadida Xitoyda ishlab chiqarilgan komponentlardan foydalanishni taqiqladi. Bu haqda to‘rt mudofaa va sanoat rasmiylariga tayanib, “Reuters” xabar berdi.

Nashrning qayd etishicha, ushbu chora yadroviy qurolga ega qo‘shnilar o‘rtasidagi keskinlik va Nyu-Dehli uchuvchisiz kvadrokopterlari, uzoq chidamli tizimlari va boshqa avtonom platformalardan ko‘proq foydalanishni nazarda tutuvchi harbiy modernizatsiyani davom ettirayotgan bir paytda amalga oshirildi.

“Ammo Hindistonning yangi sanoati armiya ehtiyojlarini qondirishga intilayotgani sababli, mudofaa va sanoat vakillari uchuvchisiz samolyotlarning aloqa funksiyalari, kameralar, radio uzatish va operatsion dasturiy ta’minotdagi Xitoyda ishlab chiqarilgan qismlari tomonidan buzilgan bo‘lishi mumkinligidan xavotirda”, deyiladi xabarda.

“Reuters” manbalariga ko‘ra, fevral va mart oylarida uchuvchisiz samolyotlar bo‘yicha tenderlarni muhokama qilish bo‘yicha ikkita yig‘ilishda harbiy amaldorlar ishtirokchilarga Hindiston bilan chegaradosh mamlakatlarning jihozlari yoki tarkibiy qismlari xavfsizlik nuqtai nazaridan qabul qilinishi mumkin emasligini aytgan.

Bayonnomada bu gapni aytgan harbiy amaldorlarning ismi ko‘rsatilmagan.

Agentlikka kelib tushgan hujjatlardan birida bunday quyi tizimlarda muhim harbiy ma’lumotlarni buzadigan xavfsizlik bo‘shliqlari borligi aytilgan va sotuvchilardan komponentlarning ishlab chiqaruvchisi nomini oshkor qilishga chaqirilgan. 

Pekin kiberhujumlarga aloqadorligini rad etgan. O‘tgan hafta ba’zi dronlar va dronlarga oid uskunalarda eksport nazoratini e’lon qilgan Xitoy savdo vazirligi Hindistonning choralari haqidagi savollarga javob bermagan.

Hindiston 2023-24 yillarda harbiy modernizatsiya qilish uchun 1,6 trillion rupiy (19,77 milliard dollar) ajratdi, shundan 75 foizi mahalliy sanoat uchun ajratilgan.

“Ammo Xitoy qismlariga taqiq ishlab chiqaruvchilarni butlovchi qismlarni boshqa joydan olishga majburlash orqali harbiy dronlarni mahalliy ishlab chiqarish narxini oshiradi”, deydi hukumat va sanoat ekspertlari.

Bengaluruda joylashgan NewSpace Research and Technologies  asoschisi, Hindiston armiyasi uchun kichik dronlarni yetkazib beruvchi Samir Joshining aytishicha, yetkazib berish zanjiridagi mahsulotlarning 70 foizi Xitoyda ishlab chiqarilgan.

Ma’lumot uchun, 2019 yilda AQSH Kongressi Pentagonga Xitoyda ishlab chiqarilgan uchuvchisiz samolyotlar va butlovchi qismlarni sotib olish yoki ulardan foydalanishni taqiqlagandi.