Hasanboy Do‘smatov finalga chiqdi

Parijda o‘tkazilayotgan 2024 yilgi yozgi Olimpiada o‘yinlarining boks bahslarida -51 kg vazn toifasida o‘zbekistonlik Hasanboy Do‘smatov yarim final bosqichida bugun, 4 avgust kuni Kabo Verde vakili David de Pinaga qarshi ringga ko‘tarildi va uni mag‘lub etdi. Shu bilan Do‘smatov Olimpiadaning finaliga chiqdi.

Endi Hasanboy Do‘smatov Olimpiadaning ikkinchi oltin medali uchun fransiyalik Bilal Bennamaga qarshi ringga ko‘tariladi. Ushbu jang 8 avgustdan 9 avgustga o‘tar kechasi, soat 1:35 da boshlanadi.Ushbu ikki bokschi o‘tgan yili Toshkentda bo‘lgan Jahon chempionatining finalida ham uchrashgandi va unda Hasanboy Do‘smatov nokaut orqali g‘alaba qozongan.

Do‘smatov yarim final yo‘llanmasini qo‘lga kiritish uchun Qozog‘iston vakili Saken Bibosinovga qarshi jang olib borgan edi.

Shuningdek, bugungi boks bahslarining yarim finalida -92 kg vazn toifasida o‘zbekistonlik Lazizbek Mullojonov Tojikiston vakili Davlat Boltayevga qarshi kurash olib boradi.