O‘zbekiston Harbiy prokurori FVVga rahbar bo‘ldi

O‘zbekiston Respublikasi Prezidentining farmoni bilan Botir Bahromovich Qudratxo‘jayev O‘zbekiston Respublikasi Favqulodda vaziyatlar vaziri lavozimiga tayinlandi. Bu haqda Prezident matbuot kotibi Sherzod Asadov ma’lum qildi.

Bildirilishicha, vazir lavozimiga tayinlangani munosabati bilan Botir Qudratxo‘jayev O‘zbekiston Respublikasi Bosh prokurori o‘rinbosari – Harbiy prokurori lavozimidan ozod etilgan.

Bundan ilgariroq Qudratxo‘jayev nomzodi Oliy Majlis Qonunchilik palatasi deputatlari tomonidan ham ma’qullangan. 

2022 yildan beri Favqulodda vaziyatlar vaziri bo‘lib ishlab kelgan general-mayor Abdulla Qo‘ldoshev nima sababdan lavozimidan ozod etilgani ochiqlanmagan.

Ma’lumot uchun, Botir Qudratxo‘jayev 2014−2016 yillarda Surxondaryo viloyati prokurori vazifasini bajaruvchi, viloyat prokurori, 2016-2017 yillarda Toshkent shahri prokurori,  2017-2020 yillarda O‘zbekiston Respublikasi Bosh prokuraturasi huzuridagi Majburiy ijro byurosi direktori, 2020-2022 yillarda Xorazm viloyati prokurori, 2022 yildan bugungacha O‘zbekiston Respublikasi Bosh prokurori o‘rinbosari, O‘zbekiston Respublikasi Harbiy prokurori lavozimida ishlagan.