Ўзбекистон Ҳарбий прокурори ФВВга раҳбар бўлди

Ўзбекистон Республикаси Президентининг фармони билан Ботир Баҳромович Қудратхўжаев Ўзбекистон Республикаси Фавқулодда вазиятлар вазири лавозимига тайинланди. Бу ҳақда Президент матбуот котиби Шерзод Асадов маълум қилди.

Билдирилишича, вазир лавозимига тайинлангани муносабати билан Ботир Қудратхўжаев Ўзбекистон Республикаси Бош прокурори ўринбосари – Ҳарбий прокурори лавозимидан озод этилган.

Бундан илгарироқ Қудратхўжаев номзоди Олий Мажлис Қонунчилик палатаси депутатлари томонидан ҳам маъқулланган. 

2022 йилдан бери Фавқулодда вазиятлар вазири бўлиб ишлаб келган генерал-майор Абдулла Қўлдошев нима сабабдан лавозимидан озод этилгани очиқланмаган.

Маълумот учун, Ботир Қудратхўжаев 2014−2016 йилларда Сурхондарё вилояти прокурори вазифасини бажарувчи, вилоят прокурори, 2016-2017 йилларда Тошкент шаҳри прокурори,  2017-2020 йилларда Ўзбекистон Республикаси Бош прокуратураси ҳузуридаги Мажбурий ижро бюроси директори, 2020-2022 йилларда Хоразм вилояти прокурори, 2022 йилдан бугунгача Ўзбекистон Республикаси Бош прокурори ўринбосари, Ўзбекистон Республикаси Ҳарбий прокурори лавозимида ишлаган.