Halima Yoqub bu yilgi saylovlarda qatnashmasligini e’lon qildi

Singapur Prezidenti Halima Yoqub bugun, 29 may kuni bu yilgi prezidentlik saylovlarida ikkinchi muddatga nomzodini qo‘ymasligini ma’lum qildi. Bu haqda u o‘z videobayonotida aytgan.

“Qadrli singapurliklar, bir necha oydan so‘ng prezidentlik saylovi bo‘lib o‘tadi, juda puxta o‘ylab ko‘rib, qayta saylanmaslikka qaror qildim. So‘nggi olti yil davomida Singapurning sakkizinchi Prezidenti sifatida xizmat qilish katta sharaf va obro‘ bo‘ldi. Tajriba eng ilhomlantiruvchi va ayni paytda kamtarin bo‘ldi”, degan u o‘z bayonotida.

Shuningdek, 68 yoshli rahbar 2017 yilda lavozimga kirishganida prezidentlik “buyuk mas’uliyat” ekanini bilgani, ammo u o‘z vazifasini sidqidildan bajarishga harakat qilganini qo‘shimcha qildi.

“Men vazifamni bajarish uchun qo‘limdan kelgancha harakat qildim. Mening maqsadim yanada g‘amxo‘r va rahmdil jamiyatni tuzishga yordam berish edi. Men bu yo‘lda hech qachon yolg‘iz bo‘lmaganimdan xursandman. Bu e’tiqodga qat’iy sherik bo‘lgan ko‘plab singapurliklar meni qo‘llab-quvvatladilar. Birgalikda ishlash orqali biz hamjamiyatimizning ovozini kuchaytirdik va eng ko‘p muhtoj bo‘lganlarni, ayniqsa, kam ta’minlangan va himoyasiz odamlarni ko‘tardik”, degan Halima Yoqub.

Halima xonimning aytishicha, prezidentlik Singapurdagi eng yuqori lavozim va uning demokratiyasidagi asosiy institutdir. Shu sababli Prezident xalq boshchisi sifatida umumiy qadriyatlar va intilishlarni o‘zida mujassamlashtirgan holda xalqini birlashtirishi darkor.

“Prezident muhim konstitutsiyaviy, jamiyat bilan bog‘liq yuqori vazifalarga ega bo‘lib, bizning zaxiralarimiz va davlat xizmatidagi asosiy tayinlovlarning ikkinchi kalitidir. Prezidentlikning Singapur kelajagini himoya qilish uchun hukumat bilan yaqindan hamkorlikda ishlayotgan birlashtiruvchi roli har doim xalqimiz muvaffaqiyati uchun muhim bo‘lib kelgan va biz notinch hamda noaniq dunyoda yo‘limizni topayotganimiz – bu har doimgidan ham muhimroq bo‘ladi”, deya qo‘shimcha qildi u.

Qolaversa, u Singapur Prezidenti sifatida ishlagan paytlari irqi, tili va ijtimoiy mavqeidan qat’iy nazar, barcha singapurliklarga xizmat qilish imkoniyatiga ega bo‘lganidan minnatdor ekanini aytdi.

“Mening faoliyatim davomida ko‘rsatgan ishonch, tushunish va mehr-oqibat uchun barcha singapurliklarga hamda meni yaxshiroq Singapur qurishga ishonchi va ishtiyoqi bilan ilhomlantirgan ko‘plab jamoat, ijtimoiy va biznes tashkilotlariga minnatdorchilik bildiraman. Bular meni qo‘limdan kelgancha jamiyatimiz va millatimizga boshqa yo‘llar bilan hissa qo‘shishda davom etishimga ilhomlantiradi. Shuningdek, men prezidentligim davomida tinimsiz qo‘llab-quvvatlagan erim va oilamga minnatdorchilik bildirmoqchiman”, dedi u uchrashgan odamlarning yoqimli xotiralari va o‘z faoliyati davomida to‘plagan tajribalarini abadiy asrab qolishiga ishontirib. 

Eslatib o‘tamiz, Halima Yoqubning vakolat muddati shu yilning 13 sentyabrida tugaydi. Shu sababli prezidentlik saylovlari 14 iyundan 13 sentabrgacha o‘tkazilishi rejalashtirilgan.

2017 yilgi saylovda faqat malay xalqi vakillari ishtirok etishi mumkin edi. Ammo navbatdagi prezidentlik saylovlari barcha irqdagi nomzodlar uchun ochiq bo‘ladi.