Жотанинг ўғиллари АПЛ учрашувида майдонга чиқади

Англия Премьер-лигасининг 18-турида бўлиб ўтадиган “Ливерпуль” ва “Вулверхемптон” ўйини бошланишидан олдин, марҳум футболчи Диогу Жотанинг икки ўғли майдонга чиқади. Бу ҳақда “The Times” хабар берди.

Ушбу учрашув эртага, 27 декабрь куни Ливерпуль шаҳрида бўлиб ўтади. Мазкур ўйин Жота вафотидан бери фаолиятининг турли даврларида ўйнаган икки жамоа ўртасидаги биринчи учрашув бўлади.

Маълумот учун, Жота 2020 йилдан бери “Ливерпуль” сафида ўйнаб келган. У жамоа билан Англия Премьер-лигаси чемпионлиги, Англия Кубоги ва икки марта Лига Кубогини қўлга киритган. Олдинроқ у Португалиянинг “Порто”, Испаниянинг “Атлетико Мадрид” ва Англиянинг “Вулверхемптон” жамоаларида майдонга тушган. Шу билан бирга, Жота Португалия терма жамоаси сафида 49 та ўйинда майдонга тушиб, 14 та гол урган.

Эслатиб ўтамиз, Диогу Жота ва унинг укаси Андре Силва жорий йил 3 июль куни йўл-транспорт ҳодисасида вафот этган эди.