Жоржиньо допинг сабабли икки йилга дисквалификация қилиниши мумкин – ОАВ

“Челси” ва “Арсенал”нинг собиқ ярим ҳимоячиси, айни пайтда “Фламенго” сафида тўп сураётган Европа чемпиони Жоржиньонинг дастлабки допинг-тести ижобий натижа берди. Эндиликда футболчи икки йилга дисквалификация қилиниши мумкин. Бу ҳақда “Pilhado” маълум қилди.

34 ёшли футболчи яқин кунларда қайта допинг-тестидан ўтказилади. Агар дастлабки натижа тасдиқланса, италиялик ярим ҳимоячи олти ойдан икки йилгача дисквалификация қилиниши мумкин.

“TyC Sports” нашрининг хабар беришича, Жоржиньода допинг-тест натижаси “Фламенго”нинг Либертадорес кубогидаги иштироки якунланганидан кейин аниқланган. Бироқ ҳозирча ушбу маълумот расман тасдиқланмаган.

Кеча, 23 октябрь куни “Фламенго” Либертадорес кубоги ярим финалида “Эстудиантес”га пенальтилар сериясида мағлуб бўлди. Жоржиньо ҳам пенальтилар сериясида зарба йўллади, аммо ўз уринишини голга айлантира олмади.

Жорий йилнинг 27 октябрга белгиланган қайта тест натижалари ишнинг кейинги жараёни ва футболчига нисбатан эҳтимолий спорт санкцияларини белгилашда муҳим аҳамият касб этади.

Маълумот учун, Жоржиньо 2025 йилнинг ёзида “Фламенго”га қўшилган. У фаолияти давомида “Арсенал”, “Челси”, “Наполи” ва “Верона” клубларида ҳам ўйнаган. “Transfermarkt” портали маълумотларига кўра, футболчининг бозор қиймати 3,5 миллион еврони ташкил этади. Унинг “Фламенго” билан шартномаси 2028 йилнинг ёзигача амал қилади.