Жиззахда шифокор ва ҳамшира икки ҳомиладор аёлнинг ўлимига сабабчи бўлди

Жиззах вилоятида икки нафар ҳомиладор аёл шифокор ва ҳамширанинг маъсулиятсизлиги сабаб вафот этди. Бу ҳақда Жиззах вилояти прокуратураси Матбуот хизмати хабар берди.

Бахмал тумани ҳудудида яшовчи ҳомиладор Э.З. ҳамда З.И. 2020 йилда диспансер назоратига олинган бўлсада, ҳудудга масъул патронаж ҳамшираси ва умумий амалиёт шифокори томонидан тўлиқ тиббий кўрикдан ўтказилмаган. Уларда аниқланган касалликларни ўз вақтида даволаш чоралари кўрилмаганлиги оқибатида улар 2021 йил апрель ойида Жиззах вилоят перинатал марказида вафот этган.

Вилоят прокуратураси томонидан мутахассисларни жалб қилган ҳолда Бахмал туманида ҳомиладор аёлларга кўрсатилаётган тиббий хизмат аҳволи ўрганилганда, туманда 2020 йилда 725 нафар ҳомиладор аёл кеч ҳисобга олинганлиги, 85 нафари умуман скрининг текширувларидан ўтказилмаганлиги аниқланди.

Шунингдек, бирламчи скрининг текширувидан ўтиб хавф гуруҳи аниқланган ҳомиладорлардан ирсий касалликларни аниқлаш (ПАПП) учун 2020 йил 6 ойи давомида қон намуналари умуман олинмаган.

Текшириш якуни билан вилоят Соғлиқни сақлаш бошқармасига тақдимнома киритилди.

Мазкур ҳолатлар юзасидан Жиззах шаҳар прокуратураси томонидан терговга қадар текшириш ҳаракатлари олиб борилмоқда.