Жим Керри ва Дуэйн Жонсонни машҳур қилган режиссёр вафот этди

АҚШлик режиссёр, “Ниқоб” (“The Mask”), “The Blob” ва “Элм кўчасидаги даҳшатли туш 3” (“A Nightmare on Elm Street 3: Dream Warriors”) фильмлари билан танилган Чак Рассел 74 ёшида вафот этди. Бу ҳақда унинг оиласи маълум қилди.

Қайд этилишича, Рассел 22 июль куни АҚШнинг Калифорния штати, Сан-Диего шаҳридаги уйида ҳушсиз ҳолда топилган. Унинг вафот этганини адвокати тасдиқлаган, аммо ўлим сабаби ҳозирча очиқланмаган.

Ўнлаб йиллик фаолияти давомида Рассел бир қатор муваффақиятли фильмларга режиссёрлик қилди. Улар қаторида “Элм кўчасидаги даҳшатли туш 3: Орзу жангчилари” (“A Nightmare on Elm Street 3: Dream Warriors”), “The Blob” ва 1994 йилда экранга чиққан “Ниқоб” (“The Mask”) фильмлари бор.

2002 йилда у “Чаён қироли” (“The Scorpion King”) фильмини суратга олди. Мазкур фильмда Дуэйн “The Rock” Жонсон илк бор бош қаҳрамон сифатида иштирок этган.

Иллинойс штатида туғилган Рассел кино соҳасидаги фаолиятини 1981 йилда экранга чиққан “Hell Night” фильмининг ижрочи продюсери сифатида бошлаган. Кейинчалик у “Dreamscape” илмий-фантастик фильмининг ҳаммуаллифи бўлган.

Унинг режиссёр сифатидаги дебюти 1987 йилда чиққан “A Nightmare on Elm Street 3: Dream Warriors” фильми билан бўлган. Танқидчилар ушбу картинани франшизанинг муваффақиятли қайтиши сифатида баҳолаган. 1988 йилдаги “The Blob” ремейкидан кейин Рассел 1994 йилда чиққан “Ниқоб” фильми орқали катта муваффақиятга эришди. Фильм Жим Керри ва Кэмерон Диасни жаҳон юлдузларига айлантирди ҳамда махсус эффектлари учун “Оскар” мукофотига номзод бўлди.

Рассел 2024 йилда берган интервьюсида “Ниқоб” дастлаб қўрқинчли фильм сифатида режалаштирилганини, аммо у студияни комедия жанрини танлашга кўндирганини айтган. Натижада 18 миллион доллар бюджетда ишланган фильм жаҳон бўйлаб 350 миллион доллардан ортиқ даромад келтирган.

Кейинги йилларда у Арнолд Шварценеггер иштирокидаги “Eraser”, Ким Бейсингер ва Кристина Риччи қатнашган “Bless the Child”, шунингдек, “The Mummy” франшизасига алоқадор “The Scorpion King” фильмларини ҳам суратга олди.

Режиссёрнинг сўнгги иши 2024 йилда экранга чиққан “Witchboard” фильми бўлди. Бу 1986 йилги шу номли қўрқинчли фильмнинг ремейки ҳисобланади.

Эслатиб ўтамиз, аввалроқ “Оскар” мукофоти соҳиби, “Чўқинтирган ота” фильми юлдузи Роберт Дюваль жорий йилнинг 15 февраль куни 96 ёшида вафот этганди.