ЖЧ саралаш тизимини ислоҳ қилиш таклиф қилинди

Туркия терма жамоаси бош мураббийи Винченцо Монтелла Европа минтақасининг Жаҳон чемпионати саралаш жараёнидан норози бўлмоқда. Монтелла FIFA’га йўлланган танқидларида Европа саралаш босқичининг Жанубий Америка билан солиштирганда ҳаддан ташқари талабчан эканини таъкидламоқда. Бу ҳақда “Marca” нашри хабар берди.

“Жаҳон чемпионатига чиқиш учун биз дунёнинг энг кучли жамоаларидан бири Испаниядан олдинга ўтишимиз керак эди. Жанубий Америкада эса узоқ давом этадиган лига тизими бор, олтита тўғридан тўғри ўрин ва хатоларга кўпроқ имконият. Бу ерда эса битта кичик хато сизни плей-оффга ёки умуман четга чиқариб юборади”, деди Монтелла.

Мутахассис саралаш тизимини ислоҳ қилиш бўйича модель ҳам таклиф қилди:

“Менимча, Чемпионлар лигаси ёки Ла Лига форматига ўхшаш тизимга ўтиш мумкин. Масалан, тўққиз жамоадан иборат олтита гуруҳ, иккита тўғридан тўғри йўлланма ва қолганлар плей-офф орқали аниқланса, адолатлироқ бўларди”,  дея таъкидлади у.

Шунингдек, Италия терма жамоаси мураббийи Женнаро Гаттузо ҳам ушбу масала юзасидан танқид билдирган эди:

“Жанубий Америкада 10 та жамоанинг 6 таси мундиалга боради, 7-си плей-офф ўйнайди... Бу адолатсизлик. Бу нарсани қайта кўриб чиқиш вақти келган”, дея фикр билдирган эди Гаттузо.

Маълумот учун, 2026 йил 11 июнда бошланадиган Жаҳон чемпионатида Европа саралашида қатнашган 54 та жамоанинг атиги 16 таси финал босқичига йўл олади (Россиянинг дисквалификация қилинганини ҳисобга олган ҳолда). Бу бор-йўғи 29,6 фоиз демакдир.

Бунга қарши равишда Жанубий Америка 10 жамоанинг 60 фоизига (олтитасига) тўғридан тўғри йўлланма берган. Агар Боливия март ойида Мексикада ўтадиган қитъалараро плей-оффдан ўтса, бу кўрсаткич яна ортади. Яъни Жанубий Америкадан атиги уч жамоа (Чили, Перу ва Венесуэла) турнирдан четда қолган. Бу қитъа саралашида иштирок этган жамоаларнинг Жаҳон чемпионатига чиқиш эҳтимоли 70 фоизга яқин, бошқа бирор конфедерацияда бу фоиз учрамайди.
Таққослаш учун:

•         Африка: 18,86%
•         Осиё: 19,5%
•         КОНКАКАФ (қўшимча мезбон ўринлари билан): 18,75%
•         Океания: 18,18%

Бу ҳозирча фақат таклиф, аммо Европа футболи саралаш жараёнининг мураккаблиги, айниқса, иккинчи даражали жамоалар учун кескин қийинчилик туғдираётганини очиқчасига кўрсатмоқда. Охирги йилларда Италия кетма-кет икки мундиални бой бергани, Португалия эса 2010 йилдан бери уч бор плей-оффга тушгани ушбу муаммо жиддийлигини тасдиқлаб турибди.