Зеленский яна Оқ уйда. Украина Tomahawk’дан қуруқ қолди

Кеча, 17 октябрь куни АҚШ Президенти Дональд Трамп ва Украина Президенти Владимир Зеленский Оқ уйда учрашиб, Украинадаги уруш ва уни тўхтатиш йўлларини муҳокама қилди. Бу ҳақда CNN хабар берди.

Учрашув бошида Зеленский Трампни Яқин Шарқдаги можарони якунлагани билан табриклаб, унинг иштирокида Украина уруши ҳам тугашига умид билдирган. Трамп эса унга жавобан Зеленскийнинг костюмини мақтаган.

Трамп Россия Президенти Владимир Путин билан Будапештда учрашишни режалаштираётганини маълум қилди. Учрашув икки томонлама шаклда ўтади, бироқ Трамп Зеленский билан алоқада бўлиб туришини айтди.

У, шунингдек, нега айнан Венгрияда учрашув ўтказишни танлаганини тушунтирган. 

“Бу биз ёқтирадиган етакчи. Бизга Виктор Орбан ёқади – у менга ҳам, Путинга ҳам ёқади. Бу хавфсиз мамлакат. У ўз ишини жуда яхши бажармоқда, ўз мамлакатини пухта бошқармоқда. Шу сабабли , биз Виктор Орбан билан учрашамиз – у жуда яхши мезбон бўлади, деб ўйлайман”, деган Трамп. 

Учрашув чоғида АҚШ Президенти Путин урушни тўхтатишни хоҳлаётганини айтиб, яна Россия томонининг баъзи ҳаракатларини мақташга ўтган. 

Трамп, шунингдек, АҚШ Украинага Tomahawk ракеталарини бермаслигини билдирган. Айтиш қийин эмаски, бу Путин билан ўтказилган суҳбатнинг таъсири. 

“Бу урушни Tomahawk’сиз тугатган маъқул. Менимча, биз бунга жуда яқинмиз”, дея Зеленскийни ҳайратда қолдирган Трамп. 

АҚШ етакчисига кўра, можаро томонлар муросага боришга тайёр бўлса, тез орада якунланади ва шу билан Украна-Россиянинг уруш китоби ҳам ниҳоясига етади. 

Не умидлар билан АҚШ ерларига қадам қўйган Зеленский эса Трампга ноилож таклиф билдирди, у Tomahawk’лар эвазига Украина дронларини таклиф қилган.

“Биз уларни ишлаб чиқарамиз. АҚШда турли ракеталар кўп, лекин биздагидек минглаб дронлар йўқ. Бизда жиддий дрон таклифи бор”, деган у.

Шундан сўнг, учрашувнинг очиқ қисми якунланган. Трамп ва Зеленский ўртасида бўлган қолган барча келишувлар ёпиқ эшиклар ортида ҳал бўлган. 

Қайд этиш жоиз, Зеленский АҚШ қуролларига катта умид боғлаган эди. У боришидан олдин ҳам, АҚШга етиб борганида ҳам Tomahawk ҳақида жуда кўп гапирди, аммо Трампнинг Путин билан бўлган 2 соатлик суҳбати Зеленский ойлар давомида умид боғлаган қуролдан айирди. 

Эслатиб ўтамиз, 16 октябрь куни Путин Трамп билан ўтказган суҳбатида АҚШнинг Украинага Tomahawk туридаги қанотли ракеталарни етказиб бериш эҳтимоли икки давлат ўртасидаги муносабатларга жиддий зарар етказиши, қолаверса, Украинадаги можарони тинч йўл билан ҳал этиш истиқболларига ҳам салбий таъсир кўрсатишини таъкидлаганди. Трамп эса бу борада лом-лим демай кўнган.