Зеленский ўзига уюштирилган суиқасд тафсилотларини очиқлади

Украина Президенти Владимир Зеленский Россия билан бошланган можаронинг дастлабки кунларида ўзига уюштирилган суиқасд тафсилотларини очиқлаб, идорасида бир неча киши ҳалок бўлганини айтди. Бу ҳақда у “The Guardian” нашрига берган интервьюсида сўз очди.

“Бизни ўлдирмоқчи бўлган одамлар бор эди. Ўқотар қуролдан ўт очилди ва баъзи одамлар айнан шу ерда, бизнинг идорамизда ҳалок бўлди. Бошқа одамлар эса бизни ҳимоя қилди. Десант қўшини туширилган эди”, деди у.

Зеленскийга кўра, унга турли одамлар босим ўтказиб, Украинани тарк этишга ундаган ва “эртага мамлакат босиб олинади, қочиш керак” мазмунидаги гаплар айтган.

Маълумот ўрнида, 2023 йил ноябрь ойида Зеленский “The Sun” нашрига берган интервьюсида ҳам Россиянинг ҳарбий ҳаракатлари бошланганидан бери унга камида беш-олти маротаба суиқасд уюштирилганини айтган.

Ўша йилнинг январь ойида “The Independent” газетаси америкалик журналист ва публицист Крис Уиппилнинг “Унинг ҳаёт учун кураши: Байден Оқ уйининг деворлари ичида” номли китобидан парчалар эълон қилган эди. Уиппилнинг ёзишича, ҳарбий ҳаракатлар бошланишидан олдин Марказий разведка бошқармасининг (CIA) собиқ директори Уильям Бёрнс Киевга бориб, Зеленскийни суиқасд таҳдиди ҳақида огоҳлантирган. Муаллифнинг таъкидлашича, Бёрнс тақдим этган разведка маълумотлари туфайли камида иккита суиқасдни олдини олишга муваффақ бўлинган.

2024 йил май ойида Украина контрразведкаси ва Хавфсизлик хизмати (СБУ) Давлат қўриқлаш бошқармасининг (УГО) иккита полковнигини қўлга олди. Украина ҳуқуқ-тартибот идораларининг версиясига кўра, бу полковниклар Россия Федерал хавфсизлик хизмати (ФСБ) учун ишлаган ва Украина раҳбариятига, жумладан, Зеленский, Бош разведка бошқармаси (ГУР) раҳбари Кирилл Буданов ва СБУ раҳбари Василий Малюкка қарши суиқасд тайёрлашда қатнашган. Идора маълумотларига кўра, суиқасдни амалга оширувчи сифатида Зеленский хавфсизлигига яқин ҳарбийлар орасидан одам қидирилган. Улардан Президентни гаровга олиб, кейин уни ўлдириш талаб қилинган.

“The Times” нашрининг ёзишича, қўлга олинган полковниклардан бири урушнинг дастлабки кунларида ўз бўйсунувчиларига Россия қўшинлари келган тақдирда қуролни ташлашни буюрган. УГО раҳбари Сергей Руд эса икки ходими ҳибсга олинганидан сўнг лавозимидан озод этилган.

СБУ полковникларнинг қўлга олингани ҳақидаги баёнотини изоҳлар экан, Россия Президенти матбуот котиби Дмитрий Песков Украина махсус хизматларининг бу маълумотларини “ишончли” деб қабул қилиб бўлмаслигини айтган. Россия расмийлари Киевнинг Зеленскийга қарши суиқасд режаси борлиги ҳақидаги баёнотларини бир неча бор рад этган.

Эслатиб ўтамиз, аввалроқ 2024 йил апрель ойида Польшада Владимир Зеленскийга суиқасд уюштиришда гумон қилинган шахс қўлга олинганди. Польша фуқароси Павель К. Россия ҳарбий разведкасига маълумот узатишда ва Россия махсус кучларига Зеленскийга эҳтимолий суиқасдни режалаштиришда ёрдам беришда айбланган.