Зеленский Уиткоффга Украинанинг “қизил чизиқлари”ни эслатиб қўйди

north_east

Трампнинг одами россияпараст таклифларни илгари сурмоқда

Украина Президенти Владимир Зеленский АҚШ Президентининг махсус вакили Стивен Уиткоффнинг Россия билан тинчлик музокараларида асосий омилга айланган Украинанинг босиб олинган бешта ҳудуди ҳақидаги сўзларига изоҳ берди. Бу ҳақда у кеча, 15 апрель куни Одессада НАТО бош котиби Марк Рютте билан матбуот анжумани чоғида сўз очди.

“Барча ҳудудлар унитар Украина давлатига қарашли. Шунинг учун... давлатимиз ҳудуди ҳақида фақат Украина халқи гапириши мумкин”, деди Зеленский.

Украина раҳбари, шунингдек, Киев учун қизил чизиқлар “вақтинча босиб олинган ҳар қандай ҳудудларни Украина эмас, балки Россия ҳудуди деб тан олиш” эканини таъкидлади. Зеленский “тегишли вакиллар” бу масалани “ўз ваколатларидан ташқари” муҳокама қилаётганини қўшимча қилди.

Эслатиб ўтамиз, АҚШ махсус вакили Стив Уиткофф “Fox News” телеканалига Россия Президенти Владимир Путин Украинада тинчлик ўрнатишга интилаётганини, аммо “бу можародаги энг катта муаммо” Кремль талаб қилаётган бешта Украина ҳудуди Россия деб тан олинишини айтган эди. Гап Қрим, Донецк, Луганск, Запорожье ва Херсон вилоятлари ҳақида бормоқда.

АҚШнинг Украина бўйича махсус вакили Кит Келлогг эса 11 апрель куни Киев ҳеч қачон Херсон, Запорожье, Луганск ва Донецкнинг тўртта вилоятини тўлиқ мулк сифатида Россияга бир томонлама равишда беришга рози бўлмаслигини айтди.