Зеленский Россияни кескин огоҳлантирди

Украина Президенти Владимир Зеленский Россиянинг Украинага берган зарбаларидан сўнг, келаси ҳафта Россия ҳаво ҳудудига оид операцияга тегишли ўзгартишлар киритилишини маълум қилди. Бу ҳақда у бугун, 5 сентябрь куни ўзининг X ижтимоий тармоғидаги саҳифасида ёзиб қолдирди.

“АҚШнинг дипломатик саъй-ҳаракатларига қарамай, Россия Эроннинг “Шаҳед” дронлари билан ҳужум қилди. Биз Россиянинг бу қадамини қайд этдик ва келаси ҳафта Россия ҳаво ҳудудига қарши операциямизни шунга мувофиқ равишда ўзгартирамиз. Зеро, у ерда дронлар ва ракеталар учаётгани сабабли Россия ҳаво ҳудуди хавфли бўлиб қолди”, деб ёзган Зеленский ижтимоий тармоғидаги саҳифасида.

Шунингдек, у Украина томонидан дипломатияга ҳеч қандай таҳдид йўқлигини ва бундан кейин ҳам бўлмаслигини билдирган.

Бу баёнот кеча, 4 сентябрь куни Зеленский АҚШ Президенти Дональд Трампнинг махсус вакиллари Стив Уиткофф ва Жаред Кушнернинг Москвага 5 сентябрь, Киевга эса эртага, 6 сентябрь куни кутилаётган ташрифлари арафасида ҳаво ҳудудида сулҳ ўрнатишни таклиф қилганидан кейин янграган.

Бироқ Россия 5 сентябрга ўтар кечаси ҳам Украинага зарбалар беришни давом эттирган. Жумладан, бугун Россиянинг Украинага уюштирган тунги ҳужуми оқибатида камида тўрт киши ҳалок бўлиб, яна тўққиз киши жароҳатланган.

Украина Қуролли кучлари эса ҳукумат ҳузуридаги Стратегик коммуникациялар маркази орқали берган изоҳида сулҳ бир томонлама ёки асимметрик бўлиши мумкин эмаслигини, айни пайтда мудофаа операцияси доирасидаги вазифалар тўлиқ бажарилаётганини билдирган.

Эслатиб ўтамиз, аввалроқ Россия Президенти Владимир Путин Украинадаги урушни дипломатик йўл билан якунлаш имконияти борлигини, бироқ бунинг учун аввало Россия ва Украина ўзаро келишиб олиши кераклигини айтган эди.