Зеленский Путин билан учрашув олдидан ўз позициясини эслатди

Украина Президенти Владимир Зеленский яна бир бор мамлакат ҳеч қачон Россия томонидан эгалланган ҳудудларни қонуний тарзда тан олмаслигини маълум қилди. Бу ҳақда Украина раҳбари кеча, 20 август куни Киевда журналистлар билан учрашувда айтиб ўтди.

Зеленский ҳудудий масалалар бўйича музокаралар фақат Россиянинг талаб ва шартлари аниқ бўлгандан кейин муҳокама қилиниши мумкинлигини айтган, бироқ Украина ўз ерларининг босиб олинишига ҳеч қачон рози бўлмаслигини таъкидлаган. 

Президентнинг асосий баёнотларига кўра, Киев яқин 7–10 кун ичида АҚШдан хавфсизлик кафолатлари бўйича тўлиқ изоҳ олишни истайди. Бу эса Путин билан кутилаётган учрашув олдидан зарур, деб ҳисобланмоқда.

Зеленский Донбасс масаласига ҳам тўхталиб, Россиянинг минтақани тўлиқ эгаллаши учун камида тўрт йил керак бўлишини айтган. Унга кўра, тўрт йил давомида Россия фақат Донецк вилоятининг учдан бир қисмини босиб олган ва Донбассни тўлиқ эгаллаш ҳақидаги гаплар ҳақиқатга тўғри келмайди.

Шунингдек, Президент Россиянинг Кинбурн қўлтиғи бўйича таклифига муносабат билдириб, бу ҳудуд уларга фақат Украина денгиз йўлларини тўсиш учун кераклигини айтган. 

Зеленский Украинада Flamingo номли янги ракета синовдан муваффақиятли ўтказилганини тасдиқлаган. Унга кўра, бу ракеталар декабрь ойидан бошлаб кўплаб ишлаб чиқарила бошлайди. 

Россиянинг Хитойни Украина хавфсизлик кафолатлари тизимига қўшиш таклифини Президент рад этган. Унинг сўзларига кўра, Украина фақат амалда ёрдам кўрсатишга тайёр давлатларнинг кафолатига таянади.

Зеленский, шунингдек, Россиянинг урушни тўхтатиш эвазига Украина ҳудудларини топшириш ҳақидаги таклифини “ҳавойи гап” деб атаб, бу Путин урушни тугатишни истамаётганидан далолат беришини айтган.

Эслатиб ўтамиз, аввалроқ Владимир Зеленский Россия Президенти Владимир Путин билан Украинадаги вазиятни тинч йўл билан ҳал қилиш бўйича Австрия, Швейцария ёки Туркияда учрашув ўтказишга розилиги, аммо учрашув Венгрия ёки Россияда бўлмаслигини айтганди.