Зеленский Берлинда: Киевга янги ёрдам ва “ғалаба режаси”

Германия канцлери Олаф Шольц ва Украина Президенти Владимир Зеленский бугун, 11 октябрь куни Россия-Украина урушини тугатиш учун тайёрланган “Ғалаба режаси”ни муҳокама қилди. бу ҳақда "Deutsche Welle" хабар берди.

Зеленский Лондон, Париж ва Римдан кейин Европага сафари доирасида Берлинга етиб борди.

Шольц кучайтирилган хавфсизлик чоралари остида вертолёти канцлер биноси орқасидаги боққа қўнган Зеленский билан саломлашди.

Учрашувдан олдин ташкил этилган матбуот анжуманида Шольц Зеленскийнинг Германияга бу йил тўртинчи бор ташриф буюраётганини айтди.

"Германия Украина томонида қатъий туришда давом этмоқда", деди у.

Германия Украинага ҳарбий ёрдам кўрсатиш бўйича Европада биринчи ва дунёда иккинчи ўринда эканини тасдиқлади. Унинг сўзларига кўра, Германия урушдан зарар кўрган инфратузилмани тиклаш учун қисқа муддатда 170 миллион евро ажратган.

Шольцга кўра, Берлин, айниқса, ҳаво ҳужумидан мудофаа соҳасида ҳарбий ёрдам беришда давом этади, Украинага IRIS-Т ракеталари, зирҳли мудофаа воситалари, жанговар танклар, гаубицалар, ўқ-дорилар ва учувчисиз ҳаво воситаларидан иборат 600 миллион евролик ёрдам пакети тақдим этилади.

Канцлернинг айтишича, Белгия, Нидерландия ва Норвегия Украинага йил охиригача 1,4 миллиард евролик пакет, жумладан, ҳарбий техника ва материаллар, ҳаво мудофаа тизимлари, гаубицалар, учувчисиз учиш аппаратлари, зирҳли транспорт воситалари, жанговар танклар, радарлар ва ўқ-дорилар етказиб беради.

“Буларнинг барчаси иккита нарсани кўрсатади. Биринчидан, Украина бизга ишониши мумкин. Иккинчидан, бу Путинга аниқ сигнал: Вақт учун ўйнаш иш бермайди. Биз Украинани қўллаб-қувватлашдан бош тортмаймиз”, дейди Шольц.

У Россияни навбатдаги тинчлик конференциясида иштирок этишга чақирди:

“Тинчликка фақат халқаро ҳуқуқ асосида эришиш мумкинлиги аниқ. Бу жуда катта куч талаб қилади. Бироқ, Украина учун адолатли ва мустаҳкам тинчликка эришиш истаги бизнинг умумий ҳаракатларимизнинг асосий тамойили бўлиб қолмоқда. Биз Россия дикта қилган дунёни қабул қилмаймиз”.

Германияга кўрсатган ёрдами учун миннатдорчилик билдирган Зеленский ҳаво ҳужумидан мудофаа соҳасида кўрсатилаётган ёрдам, бунинг натижасида минглаб одамларнинг ҳаётини сақлаб қолганини айтди. Зеленский иқтисодий ва сиёсий қўллаб-қувватлаш муҳимлигини таъкидлаб, бу келгуси йилда ҳам давом этиши кераклигини таъкидлади.

Биринчи ташкил этилган тинчлик саммитини эслаб, Зеленский иккинчи саммитга тайёргарлик кўраётганликларини айтди:

“Бугун мен федерал канцлерга Россияни қандай қилиб тинчлик ўрнатишга мажбурлашимиз, бу урушни қандай тугатишимиз ҳақидаги режани тақдим этаман”.

Зеленский буни келаси йил, 2025 йилда амалга ошириш истагини билдирди.

Зеленский Шольц билан музокаралардан сўнг Германия Президенти Франк-Валтер Штайнмайер билан учрашди.