Зеленский АҚШ вице-президенти билан учрашди

Украина Президенти Владимир Зеленский ва АҚШ вице-президенти Жеймс Дэвид Вэнс кеча, 14 февраль куни Мюнхен хавфсизлик конференцияси (MSC) доирасида музокара ўтказди. Бу ҳақда Президент матбуот хизмати хабар берди.

Музокараларда АҚШ Давлат котиби Марко Рубио, АҚШ Президенти Дональд Трампнинг Россия ва Украина бўйича махсус вакили Кит Келлогг, Украина Президенти девони раҳбари Андрий Ермак ҳам иштирок этди.

“Асосий мақсад, президент Трамп таъкидлаганидек, биз уруш тугашини истаймиз. Биз қотиллик тўхтатилишини истаймиз. Лекин биз Шарқий Европада бир-икки йил ичида можарога олиб келадиган тинчликни эмас, мустаҳкам тинчликни истаймиз”, деди Вэнс Зеленский билан суҳбатдан кейин.

Украина Президенти, ўз навбатида, АҚШ ва Дональд Трампга мамлакатини қўллаб-қувватлагани учун яна бир бор миннатдорчилик билдирди.

“Биз кўпроқ гаплашишимиз, кўпроқ ишлашимиз ва Путинни тўхтатиш ва урушни тўхтатиш режасини тайёрлашимиз керак. Биз тинчликни жуда хоҳлаймиз. Лекин бизга ҳақиқий хавфсизлик кафолатлари керак ва биз учрашувларимиз ва ишимизни давом эттирамиз”, деди у.

Шунингдек, Украина ва АҚШ жамоалари икки давлат ўртасидаги иқтисодий ҳамкорлик тўғрисидаги ҳужжатни ишлаб чиқиш бўйича ишларни давом эттиришга келишиб олди.

Билдирилишича, томонлар бир қатор муҳим масалаларни муҳокама қилган. Украина кейинги учрашувлар ва вазиятни чуқурроқ баҳолаш учун Кит Келлогнинг ташрифини интиқлик билан кутмоқда.

Эслатиб ўтамиз, олдинроқ Украина Президенти девони раҳбари Андрей Ермак АҚШ Президенти Дональд Трампнинг Россия ва Украина бўйича махсус вакили Кит Келлогг билан учрашган ва суҳбат чоғида Ермак Келлогга “Путин ҳеч қачон қоида бўйича ўйнамас”лигини айтган ва уни “ўзини алдаб қўймасликка” чақирганди.