Европаликларнинг Сурияга муносабати ўзгармоқда. Рим ҳам Дамашққа пул бермоқчи

Италия Суриядаги гуманитар лойиҳаларни молиялаштириш ва инфратузилмани тиклаш учун қарийб 68 млн евро ажратди. Бу ҳақда 27 март куни Италия Ташқи ишлар вазири Антонио Таяни парламент эшитувида маълум қилди.

Қайд этилишича, дастлабки пакет шифохоналар ва соғлиқни сақлаш, инфратузилма ва озиқ-овқат таъминоти занжирларини мустаҳкамлаш соҳасидаги гуманитар ташаббусларга ажратилган. 

“Янги кооперация лойиҳалари яқин ҳафталарда бошланади. Шунингдек, биз реконструкцияга қаратилган бизнес-форум ташкил этиш ниятидамиз”, деган Таяни.

Шунингдек, у бошқа мамлакатлар ҳам Суриянинг янги ҳукуматига ўтиш даври қийинчиликларини енгиб ўтишда ёрдам бериш учун 5,8 миллиард евро ажратишга ваъда берганини айтиб ўтган. https://qalampir.uz/news/yevropa-suriyaga-bir-necha-mlrd-yevrolik-yerdam-azhratmok-chi-116124 

Унинг сўзларига кўра, Европа Иттифоқи давлатлари, шунингдек, Сурияга қарши бир қатор санкцияларни, жумладан, энергетика, банк сектори, транспорт ва тикланиш билан боғлиқ чекловларни бекор қилган. 

Таянининг айтишича, шу ойда Суриянинг янги ҳукумати мамлакатда ислом ҳуқуқининг марказий ролини сақлаб қолган конституциявий декларацияни эълон қилган. https://qalampir.uz/news/suriyaning-muvak-k-at-konstitutsiyasi-k-abul-k-ilindi-116002

“Конституциявий декларация ижобий қадам бўлиб, санкцияларни аста-секин ва эҳтиёткорлик билан юмшатишга ёрдам беради”, деган у ўз нутқида. 

Эслатиб ўтамиз, олдинроқ Европа Иттифоқининг яна бир давлати – Германия 13 йиллик танаффусдан кейин Сурияда элчихонасини қайта очганди. Элчихонани Германия Ташқи ишлар вазири Анналена Бербок Дамашққа ташрифи давомида очиб берди.