46 ёшли Роналдиньо 2015 йилдан буён илк расмий ўйинини ўтказади

Италиянинг “Равенна” жамоаси бош мураббийи Андреа Мандорлини бразилиялик Роналдиньо жамоанинг навбатдаги учрашувида асосий таркибда майдонга тушишини маълум қилди. Бу ҳақда Мандорли BBC’га берган интервьюсида сўз очди.

“У асосий таркибда бошлайди, бунга шубҳа йўқ. Кейин қанча вақт ўйнашини биргаликда ҳал қиламиз. У бизнинг давримизнинг энг ажойиб футболчиларидан бири. Биз эса натижа қайд этишимиз керак. Доимо уч нафар ҳужумчи билан ўйнаймиз. У улардан бири бўлади”, дейди Мандорли.

Бироқ мураббий футболчининг майдонда қанча вақт ҳаракат қилишини ҳозирча аниқлаштирмаган. Италиянинг С-Серия вакили “Равенна” кейинги учрашувини эртага, 15 ноябрь куни ўз майдонида “Форли”га қарши ўтказади.

Маълумот учун, Роналдиньо Бразилия терма жамоаси сафида 2002 йилги жаҳон чемпиони, шунингдек, 2005 йилда “Олтин тўп” совринини қўлга киритган. Фаолияти давомида у “Гремио”, ПСЖ, “Барселона”, “Милан”, “Фламенго”, “Атлетико Минейро”, “Керетаро” ва “Флуминенсе” клубларида тўп сурган.

Бразилиялик футболчи профессионал фаолиятини якунлаганини 2018 йил январь ойида эълон қилган. У сўнгги расмий учрашувини 2015 йилда ўтказган. 

Эслатиб ўтамиз, жорий йилнинг август ойида Роналдиньо ва “Равенна” клуби бразилиялик собиқ футболчининг камида битта расмий учрашувда иштирок этиши бўйича келишувга эришган. Шунингдек, клуб унинг R10 брендига тегишли белгилардан фойдаланиш ҳуқуқини қўлга киритган. Роналдиньо эса клуб акцияларидан улуш сотиб олган.