Ермак Украинада тинчликка эришиш учун 3 та шартни айтди

Украина Президенти девони раҳбари Андрей Ермак Европа ва Қўшма Штатлар учун Украинада узоқ муддатли тинчликни таъминлайдиган учта асосий “танқидий муҳим” шартни, жумладан, Россияга нисбатан “сиёсий ва молиявий босим”ни айтиб ўтди. Бу ҳақда у “The Guardian” нашрига берган мақоласида айтиб ўтди.

“Биринчидан, Украина келажакда сулҳ битимининг ишончлилигини таъминлайдиган хавфсизлик кафолатлари билан таъминланиши керак.

Иккинчидан, Европа Россияга қарши санкцияларни кучайтириш ва кўпайтириш учун қатъий ҳаракат қилиши керак.

Учинчидан, Европа Россиянинг музлатилган активлари устидан назоратни ўз қўлига олиши керак, бу эса Украинани доимий ва кўпроқ қўллаб-қувватлашни таъминлаши керак”, деди Ермак.

Унинг қайд этишича, ўтган ҳафта Европа Кенгаши йиғилиши Европа бирлашган ҳолда ўз хавфсизлиги ва тақдирини ўзи назорат қила олишини исботлаган.

“Айнан кучли Европа хавфсизлигидан манфаатдорлик Украинани ушбу шартларни бажаришда туриб олишга ундайди. Москванинг Украинага қарши ўн йиллик тажовузкорлигини енгил қабул қилиб бўлмайди – Европа етакчилари буни тан олишади ва биз уларни ҳозирги ўта муҳим вақтда ўтган пайшанба куни Брюсселда эришилган истиқболли келишувларни амалга оширишга чақирамиз”, деб таъкидлади сиёсатчи.

Эслатиб ўтамиз, 6 март куни Европа Иттифоқининг Украина бўйича махсус саммити бўлиб ўтганди. Европа Иттифоқи раҳбарлари консенсусга эришишга ҳаракат қилди, ЕИ элчилари йиғилиш бошланишига қадар бир неча ҳафта давомида умумий баёнот матни устида бирга ишлади, кўплаб дипломатлар овоз беришга ижодий ёндашиш ва “конструктив тийилиш”га умид билдирди, бироқ Виктор Орбан вакили бўлган Венгрия қатъийлигича қолди.

Венгрия раҳбари Европа Иттифоқининг Украина бўйича позициясидан узоқлашди ва баёнот 27 эмас, 26 ҳукумат ва давлат раҳбари томонидан қабул қилинди. Саммит хулосалари матнига Украина орқали газ транзити бўйича банд қўшиш орқали Словакия билан муроса топилди.