Енотлар чиқиндидан тўп ясаб, бир-бирига “футбол” ўйнашни ўргатди (видео)

Мексиканинг Косумель оролида яшовчи карлик енотлар чиқиндидан мустақил равишда ўйинчоқ ясашни ўрганиб, улар билан футболга ўхшаш ўйинлар ўйнай бошлади. Бу ҳақда “ New Scientist” хабар берди.

Тадқиқотчи Несси О’Нил туризмнинг карлик енотларга таъсирини ўрганиш жараёнида ҳайвонлардан бири чиқинди қутисидан қоғоз олиб, уни сувга ботиргани ва кейин қумга булғаб, шар шаклига келтирганини видеога олган.

Тадқиқотчи кейинги кунларда енотлар қоғоз ва қумдан ясалган шарлар билан бирга ўйнаётганини кузатган. Ўйинга бошқа енотлар ҳам қўшилган.

Олимларнинг айтишича, ёш енотлар ушбу кўникмани бир-биридан ўрганган ва ҳатто она енотга ҳам шу усулни ўргатишга уринган. Бироқ онаси бу ҳаракатни такрорлай олмаган.

Тадқиқотчилар ҳайвонларнинг ўйинчоқ ясаши кам учрайдиган ҳолат эканини қайд этган. Энди олимлар енотлар ушбу кўникмани кейинги авлодларга ҳам ўргатиш-ўргатмаслигини аниқламоқчи.

Маълумот учун, карлик енотлар фақат Косумель оролида учрайди ва йўқолиб кетиш хавфи остида. Табиатда уларнинг 200 дан камроқ вакили қолган.

Эслатиб ўтамиз, аввалроқ Токиодаги Ханеда аэропортида Мексикадан Жанубий Корея орқали келган 23 ёшли эркакнинг юкидан 200 га яқин калтакесак топилгани ҳақида хабар берилган эди.