ЕИ йиғилишида уч ойлик чақалоқ қатнашди

Бугун, 25 июнь куни швециялик вазир Европа Иттифоқи мамлакатлари вазирларининг иқлим ўзгариши сиёсатига бағишланган Люксембургдаги йиғилишига уч ойлик ўғлини олиб борди. Бу ҳақда “Reuters” хабар берди.

Қайд этилишича, музокара столи атрофидаги энг ёш иштирокчи кўпчиликнинг эътиборини тортган. Уч ойлик чақалоқ Адам йиғилиш қатнашчилари орасида энг ёш иштирокчи бўлган.

Швециянинг Иқлим вазири Ромина Пурмохтари ўғли Адамни ЕИ Кенгаши йиғилишига олиб бориб, ота-оналар таътили сиёсати аёлларни иш ва оила ўртасида танлов қилишга мажбур этмаслиги кераклигини намойиш қилишни мақсад қилганини айтган.

“Мен бундай танлов қилиш шарт эмаслигининг амалий намунасини кўрсатмоқчи эдим. Албатта, бунинг учун ҳам шеригингиз замондан ортда қолган инсон бўлмаслиги, балки замонавий қарашларга эга ва бу ишни қўллаб-қувватлайдиган одам бўлиши керак”, деган Пурмохтари.

Европа Иттифоқи Кенгаши расмийсининг маълум қилишича, муассаса тарихида биринчи марта бир чақалоқ ЕИ вазирлари йиғилишида иштирок этган.

Маълумотларга қараганда, 30 ёшли Пурмохтари 2022 йилда лавозимга тайинланганида Швеция тарихидаги энг ёш вазир бўлган. У яқинда ота-оналар таътилидан қайтган. Шу вақтда унинг турмуш ўртоғи сентябрь ойида бўлиб ўтадиган Швеция сайловларига қадар таътилда бўлиб, Адамга қараш учун Люксембургга бирга келган.

Швециядаги ота-оналар таътили сиёсати

Швеция дунёдаги энг саховатли ота-оналар таътили тизимларидан бирига эга. Мамлакатда юқори солиқлар ҳисобига молиялаштириладиган мазкур тизим сайловолди кампаниясидаги баҳсли мавзулардан бирига айланган.

Мамлакатда ота-оналар жами тахминан 16 ойлик ҳақ тўланадиган таътил олиш ҳуқуқига эга. Шу муддатнинг 90 куни ҳар бир ота-она учун алоҳида ажратилади ва бошқасига ўтказилмайди. Агар белгиланган кунлардан фойдаланилмаса, улар бекор қилинади. Кўпинча “оталар ойлари” деб аталадиган ушбу тартиб оталарни фарзанд тарбиясида фаолроқ иштирок этишга ундаш мақсадида жорий қилинган.

Пурмохтарининг айтишича, айнан шу сиёсат ва унинг жамоаси кўрсатган қўллаб-қувватлаш турмуш ўртоғининг Адамга қараши ва унинг ишини давом эттириши масаласини “анча кам баҳсли” қилган. Вазирнинг таъкидлашича, қўллаб-қувватловчи сиёсатлар фақат таътил муддатини узайтириш учун кўпроқ солиқ маблағлари сарфлаш билан чекланмаслиги керак.

У ҳукуматларни ота-оналар ўртасида таътилни янада мослашувчан тақсимлаш ва арзон болалар парвариши хизматларини кенгайтириш имкониятларини ҳам кўриб чиқишга чақирган.

“Бу жуда катта қиймат яратади ва уни камситиб бўлмайди. Бу қиймат ҳар доим ҳам иқтисодий бўлмаслиги мумкин, аммо охир-оқибат иқтисодий самара ҳам бериши мумкин. Масалан, иш ва оила ўртасида мувозанат сақлашга қийналаётган ота-оналарнинг ҳолдан тойиб қолишининг олди олинади”, деган у.

Польша Иқлим вазирининг ўринбосари Кшиштоф Болеста эса сиёсий йиғилишда чақалоқ иштирок этиши ҳеч қандай муаммо туғдирмаганини айтган.

“Менимча, бу ажойиб ҳолат. Бу қандайдир тўсиқ эмас, бу ҳаётнинг бир қисми, холос”, деган у “Reuters”га.