ЕИ Россияга қарши санкцияларни маълум муддатгача узайтирди

north_east

“Сабр косам тўлмоқда”. Трамп Россияга оғир санкциялар билан таҳдид қилди

Европа Иттифоқи Россияга қарши барча санкцияларни яна олти ойга – 2026 йил 15 мартгача расман узайтирди. Бу ҳақда Европа Иттифоқи Кенгаши хабар берди.

Қайд этилишича, мавжуд чеклов чоралари жисмоний шахсларнинг Европа Иттифоқи ҳудудларига кириши ёки транзит ўтишига тўсқинлик қиладиган саёҳатларни тақиқлашни, активларини музлатишни ва рўйхатга олинган жисмоний ва юридик шахсларга маблағлар ёки бошқа иқтисодий ресурсларни тақдим этишни тақиқлашни назарда тутади. Санкциялар Россиянинг Украинага қарши давом этаётган урушига жавобан нишонга олинган 2500 дан ортиқ жисмоний ва юридик шахсларга нисбатан қўлланилишида давом этади.

Франция Ташқи ишлар вазири Жан-Ноэль Барронинг сўзларига кўра, янги чекловлар тўплами 15 сентябрда эълон қилиниши режалаштирилган. У Россия ва унинг раҳбари Владимир Путинга босимни кучайтириш мақсадида қилинмоқда. Барронинг таъкидлашича, санкцияларнинг мазмуни бевосита АҚШ Президенти Дональд Трамп билан келишилиши лозим.

Шу билан бирга, Европа Иттифоқи Россияга қарши шахсий санкцияларни узайтириш доирасида бир шахсга нисбатан чекловларни олиб ташлади, унинг номи ЕИнинг расмий журналида қарор эълон қилинганидан кейин маълум қилинади.

Эслатиб ўтамиз, аввалроқ АҚШ Президенти Дональд Трамп агар НАТО давлатлари Россия нефтини сотиб олишни тўхтатса, Россияга қарши “жиддий санкциялар” қўйишга тайёрлигини айтганди. Америка Президенти Шимолий Атлантика альянси айрим аъзоларининг Россия нефтини сотиб олишини “ҳайратланарли” деб атади ва бу НАТОнинг музокаралардаги позицияси ва альянснинг Москвага таъсирини заифлаштиришини қўшимча қилди. Бундан ташқари, АҚШ Савдо вазирлиги санкциялар рўйхатини кенгайтириб, унга Россия билан алоқалари учун 32 та хорижий компанияни киритганди.